Deputeti nga radhët e Lëvizjes Vetëvendosje, Agim Bahtiri, ka sqaruar ndërhyrjen e ashpër që bëri gjatë konferencës së shefes së Grupit Parlamentar të LDK-së, Jehona Lushaku-Sadriu.
Bahtiri tha se aty shkoi me konsultim paraprak me kryeministrin Kurti, transmeton IndeksOnline.
“Nëse përnjëmend i kanë ato nënshkrime, le t’i japin, e mos t’i mbajnë “në ajër”, mos të luajnë me popullin e Kosovës. Mjaft është mjaft!” ka thënë Bahtiri.
Sipas tij, LVV-ja po bën të pamundurën për të zgjedhur presidenten sonte, ndërkohë që LDK-ja, sipas tij, po bën teatër me një letër nënshkrimesh.
Ky është postimi i plotë i tij:
Mirëmbrëma të dashur qytetarë!
E di se jeni duke e përcjellë me vëmendje situatën aktuale në kuvend, prandaj e ndjej obligim moral që t’iu jap sqarim.
Me konsultim paraprak me kryeministrin Kurti, shkova në vendin ku po mbahej konferenca për shtyp e LDK-së që t’i kërkoj nënshkrimet në mënyrë që sa më shpejt të gjejmë zgjidhjen për çështjen e Presidentes. Nëse përnjëmend i kanë ato nënshkrime, le t’i japin, e mos t’i mbajnë “në ajër”, mos të luajnë me popullin e Kosovës. Mjaft është mjaft!
Ne po bëjmë të pamundurën që ta zgjedhim Presidenten sonte, ndërkohë që ata bëjnë teatër, me një letër nënshkrimesh në të cilën figuron data 25 prill e jo 27 prill, dhe në të cilën nuk ka as emër kandidati, as vule, e as protokollim. Ky popull nuk është analfabet. Sheh, din dhe kupton. Ndërsa këtë opozitë, si çdoherë, do ta ndëshkon.