**Neuer, portier i parë për Gjermaninë në Botërorin 2026, Baumann mbetet jashtë**
Vendimi për portën e Gjermanisë në Kupën e Botës 2026 duket se është marrë. Trajneri Julian Nagelsmann raportohet se ka informuar Oliver Baumannin se ka ndërmend të zgjedhë Manuel Neuerin si portierin e parë të kombëtares.
Sipas të përditshmes “Bild”, trajneri 38-vjeçar ka telefonuar drejtpërdrejt portierin e Hoffenheimit për t’i shpjeguar se, për momentin, ai nuk shihet si numri një për turneun e verës së ardhshme.
Kështu, porta e Gjermanisë pritet t’i besohet sërish Neuerit. Portieri veteran i Bayern Munichut ka kaluar përpara Baumannit, i cili kishte qenë një nga pikat më të qëndrueshme të kombëtares gjatë kualifikimeve për Botëror.
Për Baumannin, ky është një vendim i hidhur. 35-vjeçari ka qenë në formë të shkëlqyer muajt e fundit, duke u dëshmuar si një shtyllë e besueshme gjatë fushatës kualifikuese dhe duke krijuar përshtypjen se më në fund kishte fituar shansin për të qenë titullar. Megjithatë, emri i Neuerit vazhdon të ketë peshë të madhe në futbollin gjerman, sidomos pasi forma e tij e fundit është vlerësuar pozitivisht.
Pavarësisht zhgënjimit, Baumann ka treguar karakter dhe frymë skuadre. Sipas raportimit, portieri i Hoffenheimit i ka bërë të ditur Nagelsmannit gjatë së njëjtës telefonatë se do të mbetet plotësisht i gatshëm për kombëtaren, edhe nëse roli i tij në Kupën e Botës do të jetë ai i sfiduesit.
**Rreziqet e zgjedhjes së Neuerit dhe gjendja shëndetësore**
Megjithatë, zgjedhja e Neuerit, i cili në kohën e turneut do të jetë 40 vjeç, sjell edhe rrezik sportiv për planet e Nagelsmannit. Portieri, i cili ishte tërhequr nga Gjermania në vitin 2024, ka dhënë sërish sinjale shqetësuese për gjendjen e tij fizike.
Në ndeshjen e fundit zyrtare para publikimit të skuadrës, Neuer u detyrua të largohej para kohe nga fusha. Diagnoza ishte një problem në pulpën e majtë, një zonë muskulore që e ka shqetësuar shpesh veteranin gjatë karrierës së tij.
Sipas “Bild”, kapiteni i Bayernit mbërriti të hënën në qendrën stërvitore të klubit, por nuk mori pjesë në stërvitje. Në vend të kësaj, ai iu nënshtrua trajtimit mjekësor.
Me finalen e Kupës së Gjermanisë dhe turneun pasues në Amerikën e Veriut në horizont, Bayerni nuk dëshiron të marrë rreziqe. Lajmi i mirë është se ekzaminimet kanë përjashtuar një dëmtim strukturor në muskul, siç mund të ishte këputja e fibrave.
Kjo e mban të hapur mundësinë për një rikthim të shpejtë. Finalja e Kupës së Gjermanisë mes Bayern Munichut dhe VfB Stuttgartit zhvillohet këtë të shtunë, ndërsa aktivizimi i Neuerit në “Olympiastadion” të Berlinit mbetet një skenar realist. Për të, ajo mund të jetë një mundësi ideale për të dhënë një sinjal të fortë para Kupës së Botës.
**Rikthimi i bujshëm pas tërheqjes**
Rikthimi i Neuerit do të shënonte një nga kthesat më të bujshme në historinë e fundit të Federatës Gjermane të Futbollit (DFB). Neuer kishte njoftuar tërheqjen nga kombëtarja më 21 gusht 2024, pas 124 ndeshjeve me Gjermaninë. Humbja 1-2 pas vazhdimeve ndaj Spanjës në çerekfinalet e Euro 2024, e zhvilluar më 5 korrik 2024, dukej se do të ishte ndeshja e tij e fundit me fanellën e “Mannschaft”.
Vetë Neuer është treguar i qetë, por edhe enigmatik, kur është pyetur për këto zëra pas fitores së Bayernit 5-1 ndaj 1. FC Köln. “Jam plotësisht i qetë për këtë. Sot po festojmë titullin në kampionat. Javën e ardhshme kam një ndeshje shumë të rëndësishme në Kupën e Gjermanisë. Prandaj, për mua nuk është temë,” tha ai.
Kur gazetarët e pyetën nëse mund ta përjasokonte kategorikisht rikthimin në kombëtare, kampioni i botës i vitit 2014 buzëqeshi dhe u përgjigj: “Këtë nuk keni nevojë ta dini.”