Konsumimi i një portokalli në ditë mund të kontribuojë ndjeshëm në ruajtjen e shëndetit të syve dhe parandalimin e problemeve të shikimit.
Këtë e sugjeron një studim i fundit, i udhëhequr nga profesori Bamini Gopinath i Universitetit të Sidnejt. Hulumtimi thekson se flavonoidet, përbërës aktivë që gjenden te portokalli, janë antioksidantë të fuqishëm që luajnë një rol kyç në mbrojtjen e shikimit.
Profesori Gopinath shpjegon se ndonëse flavonoidet gjenden pothuajse në të gjitha frutat dhe perimet, duke pasur veti anti-inflamatore dhe duke forcuar sistemin imunitar, ato të portokallit duket të jenë veçanërisht të dobishme për shikimin. Ai shton se, për arsye që ende nuk janë kuptuar plotësisht, flavonoidet e portokallit janë më efektive për sytë sesa ato të mollës.
Detajet e plota të këtij studimi janë publikuar në revistën prestigjioze shkencore “The American Journal of Clinical Nutrition”.