Tregu i punës në Maqedoninë e Veriut po përballet me mungesa të theksuara punëtorësh, me disa profesione që shënojnë kërkesë rekord. Sipas Agjencisë për Punësim, kamarierët, pastruesit dhe shitësit janë ndër pozicionet më të kërkuara aktualisht. Krahas tyre, Agjencia ka shpallje aktive edhe për punonjës në hotelieri, punëtorë të përgjithshëm, marangozë, programues dhe nëpunës administrativë.
Ndryshe nga përshtypja fillestare, të dhënat zyrtare tregojnë se shitësit mbeten profesioni me kërkesën më të lartë në treg. Agjencia për Punësim ka regjistruar 555 pozicione të lira për shitës, duke qenë në krye të listës edhe në analizat e mëparshme, ku numri arrinte në 701 vende.
Profesioni i pastruesit të hapësirave banesore dhe afariste renditet i dyti, me 544 vende të lira pune. Ky profesion, që dikur ishte në krye të listës, kishte 639 pozicione të hapura pak kohë më parë.
Ndërkohë, pozicioni i kamarierit ka shënuar një rritje të ndjeshme, duke arritur në 531 vende të lira pune, nga 448 që ishin më parë. Kjo rritje i atribuohet kryesisht kërkesës sezonale, por edhe largimit të fuqisë punëtore drejt destinacioneve turistike rajonale e më gjerë.
Nevoja është e madhe edhe për punëtorë të përgjithshëm (349 vende), shoferë kamioni (308), banakierë (275) dhe nëpunës administrativë (252). Programuesit, megjithëse një profesion i preferuar nga të rinjtë, kanë vetëm 97 pozicione të hapura.
Në nivel sektorësh, akomodimi dhe shërbimi i ushqimit kryeson me 1,648 vende pune. Pasojnë tregtia me shumicë dhe pakicë me 1,577 pozicione, si dhe industria përpunuese me 1,541 vende të hapura.
Shkupi vazhdon të jetë qyteti me numrin më të lartë të vendeve të lira të punës, me gjithsej 5,668 pozicione. Pas kryeqytetit renditen Tetova (518), Ohri (511), Strumica (441) dhe Manastiri (368).