**KQZ nis rinumërimin e votave në 185 vendvotime në Kosovë; ja lista e komunave të prekura**
Qendra e Numërimit dhe Rezultateve (QNR) ka nisur zbatimin e vendimit të Komisionit Qendror të Zgjedhjeve (KQZ) për rinumërimin e fletëvotimeve në 185 vendvotime të rregullta, të shpërndara në të gjitha komunat e Kosovës. Mes komunave të përfshira në këtë proces janë Prishtina, Prizreni, Gjakova dhe Ferizaj.
Sipas zëdhënësit të KQZ-së, Valmir Elezi, ky vendim i referohet zgjedhjeve të zhvilluara më 7 qershor 2026. Ai thekson se 185 vendvotimet e caktuara për rinumërim, të cilat paraprakisht janë numëruar në Qendrat Komunale të Zgjedhjeve, përbëjnë 7.41% të totalit prej 2,498 vendvotimeve të rregullta në të gjithë vendin.
Vendvotimet që do të rinumërohen, sipas komunave, janë si më poshtë:
Deçan (4 vendvotime, 8.33%); Gjakovë (10, 6.94%); Gllogoc/Drenas (5, 6.85%); Gjilan (9, 7.09%); Dragash (4, 7.02%); Istog (4, 6.67%); Kaçanik (3, 6.82%); Klinë (5, 8.06%); Fushë Kosovë (5, 8.06%); Kamenicë (3, 6.52%); Mitrovicë e Jugut (7, 7%); Leposaviq (2, 8%); Obiliq (3, 8.82%); Rahovec (5, 6.67%); Pejë (9, 6.67%); Podujevë (7, 6.80%); Prishtinë (18, 6.87%); Prizreni (16, 6.90%); Skënderaj (5, 7.04%); Shtime (3, 9.09%); Shtërpcë (2, 11.76%); Suharekë (6, 6.98%); Ferizaj (10, 6.85%); Viti (5, 8.06%); Vushtrri (6, 6.74%); Zubin Potok (2, 13.33%); Zveçan (2, 18.18%); Malishevë (5, 6.94%); Junik (1, 16.67%); Mamushë (1, 20%); Hani i Elezit (1, 9.09%); Graçanicë (3, 9.09%); Ranillug (1, 10%); Partesh (1, 14.29%); Kllokot (2, 25%) dhe Mitrovicë e Veriut (2, 9.52%).
Vendimi i KQZ-së bazohet në Rregulloren Zgjedhore për funksionimin e QNR-së. Ky akt nënligjor parashikon që pas pranimit të materialeve zgjedhore nga vendvotimet e rregullta në QNR, Komisioni të vlerësojë situatën dhe, sipas nevojës, mund të vendosë për rinumërim.
Kjo masë kontrolli, siç shpjegon Elezi, është parashikuar nga KQZ për të adresuar problemet e evidentuara në disa nga Qendrat Komunale të Numërimit gjatë numërimit të votave të kandidatëve për deputetë nga zgjedhjet e dhjetorit të vitit të kaluar. Qëllimi është të sigurohet që numërimi të jetë zhvilluar me saktësi maksimale.