Djali i Liam Payne Trashëgon Mbi 24 Milionë Euro; Këngëtari Nuk La Testament
Djali tetëvjeçar i këngëtarit të ndjerë Liam Payne, Bear Grey Payne, pritet të trashëgojë të gjithë pasurinë e babait të tij, e cila vlerësohet në mbi 24 milionë euro (rreth 21.9 milionë paund neto). Kjo vjen pas konfirmimit se ish-anëtari i grupit One Direction nuk kishte lënë një testament para vdekjes së tij tragjike në tetor të vitit 2024.
Sipas dokumenteve të reja të administrimit të trashëgimisë, të depozituara në Gjykatën e Lartë të Britanisë së Madhe, dhe bazuar në legjislacionin britanik, pasi Payne nuk ishte i martuar dhe nuk kishte një partneritet civil të regjistruar, trashëgimtari i vetëm ligjor i pasurisë së tij është djali që ai pati me këngëtaren Cheryl Tweedy.
Dokumentet gjyqësore parashikojnë që një pjesë e pasurisë do të përdoret për nevojat dhe mirëqenien e Bear përpara se ai të arrijë moshën madhore. Pjesa tjetër do të mbetet nën administrim të posaçëm deri në moshën 18-vjeçare të djalit.
Në maj të vitit 2025, nëna e Bear, Cheryl Tweedy, së bashku me avokatin e industrisë muzikore, Richard Bray, u emëruan administratorë të pasurisë. Ata do të kenë të drejtën të menaxhojnë dhe përdorin asetet në interes të trashëgimtarit të mitur.
Ndër asetet më të vlefshme të artistit përfshihet një vilë luksoze me pesë dhoma gjumi në Chalfont St Giles. Payne e kishte blerë atë në vitin 2021 për 3.25 milionë paund, me synimin për të qenë më pranë djalit të tij pas ndarjes nga Cheryl.
Liam Payne humbi jetën në moshën 31-vjeçare pasi ra nga ballkoni i një hoteli në Buenos Aires, Argjentinë. Autoritetet argjentinase konfirmuan se shkaku i vdekjes ishte politrauma, ndërsa hetimet për rrethanat e ngjarjes vijojnë ende.