Policia në shtetin amerikan të Illinois njoftoi sot se po heton një kërcënim me bombë në shtëpinë e John Prevost, vëllait të Papa Leoni XIV, pranë Çikagos. Pas një kontrolli të hollësishëm, u konfirmua se bëhej fjalë për një alarm të rremë, pasi nuk u zbulua asnjë pajisje shpërthyese ose e rrezikshme.
Kërcënimi u raportua mbrëmë në adresën e Prevost në New Lenox, një zonë rreth 60 kilometra në jugperëndim të Çikagos, sipas mediave lokale dhe agjencisë Reuters. Pas marrjes së informacionit, policia evakuoi shtëpitë përreth dhe kreu një kontroll të imtësishëm të zonës. Autoritetet e New Lenox nuk iu përgjigjën menjëherë kërkesave për koment.
Në një deklaratë, policia theksoi: “Pas një shqyrtimi të kujdesshëm, hetuesit përcaktuan se kërcënimi ishte i pabazuar dhe se nuk kishte pajisje shpërthyese ose materiale të rrezikshme.” Hetimi është në vazhdim për të përcaktuar origjinën e këtij raporti të rremë.
Ky incident ndodhi pak pasi Presidenti amerikan, Donald Trump, kritikoi Papa Leonin XIV të dielën, lidhur me deklaratat e tij për luftën në Iran. Papa Leoni XIV, me origjinë nga Çikago, i cili udhëheq Kishën Katolike me rreth 1.4 miliardë besimtarë, është njohur kohët e fundit si një kritik i hapur i luftës, sipas agjencisë së lajmeve.
Në një fjalim të mbajtur sot në Kamerun, Papa Leoni XIV kritikoi udhëheqësit që shpenzojnë miliarda për konflikte, duke theksuar se bota po shkatërrohet nga një “grusht tiranësh”.
Ndërkohë, Trump, i cili më parë e kishte kritikuar Papa Leonin XIV si “shumë liberal” dhe “të butë ndaj krimit”, vlerësoi vëllanë tjetër të tij, Louis nga Florida, për mbështetjen e lëvizjes së tij “Bëjeni Amerikën të Madhe Përsëri”.
John Prevost është një nga vëllezërit e mëdhenj të Papa Leoni XIV.