**Real Madridi dhe Barcelona, në garë për yllin e ri të futbollit evropian**
Kees Smit, mesfushori i talentuar i AZ Alkmaar, po shkëlqen si një nga zbulimet më të mëdha të futbollit evropian. Prania e tij në qendër të vëmendjes sugjeron një largim të mundshëm drejt një klubi të madh në fund të sezonit.
Dy gjigantët evropianë, Real Madridi dhe Barcelona, shfaqin interesin më të madh për 20-vjeçarin.
Rafael van der Vaart, ish-futbollist i Real Madridit, shprehet i bindur për potencialin e tij: “Nëse ai vazhdon të zhvillohet në këtë mënyrë, pa dyshim do të përfundojë te Real Madridi ose në një prej klubeve më të mëdha të botës – për mua, te Real Madridi.”
Nga ana tjetër, Barcelona ruan një lidhje të fortë historike me futbollin holandez, e cila daton që nga ardhja e Johan Cruyff në klub gjatë viteve ’70.
Vetë Smit, megjithëse me humor, ka lënë të kuptohet se preferon Barcelonën. Ai do të festojë fitoren e Kupës Holandeze me AZ Alkmaarin në kryeqytetin katalanas, duke shfrytëzuar rastin për të bërë shaka rreth të ardhmes së tij.
“Nëse më kërkojnë të negocioj, jam plotësisht i gatshëm. Sigurisht, kam kohë për këtë,” deklaroi ai për “ESPN”.
Smit konsiderohet gjerësisht si një talent i madh evropian, duke bërë që klubet e mëdha të futbollit ta ndjekin nga afër.
Barcelona mbetet një opsion real, ndonëse shuma e përfolur prej rreth 50 milionë eurosh është e konsiderueshme, veçanërisht duke pasur parasysh gjendjen aktuale financiare të klubit.
Edhe trajneri Ronald Koeman e ka vlerësuar Smitin, duke e cilësuar si “një lojtar ideal për Barcelonën” dhe si një kombinim të Frenkie de Jongut me Pedrin.
Ndërkohë, mesfushori po shijon suksesin e parë të rëndësishëm me ekipin e tij – fitoren e Kupës Holandeze – por mbetet me këmbë në tokë: “Do të donim të festonim kështu çdo javë, por kjo nuk është e mundur. Tani duhet të kthehemi në normalitet. Kemi ende disa ndeshje përpara.”