**Reshjet e Dendura Shkaktojnë Përmbytje në Rrugët e Vlorës**
Reshje shiu të shkurtra, por me intensitet të lartë, kanë shkaktuar përmbytje të rrugëve në disa zona të qytetit të Vlorës.
Situata më problematike është konstatuar në lagjen Pavarësia, por vështirësi në qarkullim ka pasur edhe në rrugë të tjera, ku disa segmente janë nën ujë.
Banorët e lagjes Pavarësia shprehin shqetësimin për bllokimin e pusetave, të cilat, sipas tyre, janë mbushur me gurë dhe materiale të tjera inerte. Ky bllokim pengon kullimin e ujërave, duke bërë që ato të qëndrojnë për një kohë të gjatë në rrugë dhe pranë banesave.
Banorët druhen se, nëse reshjet vijojnë me të njëjtin intensitet ose zgjasin, situata mund të përkeqësohet ndjeshëm, duke arritur deri në pamundësinë për të hyrë në banesat e tyre.
Për këtë arsye, ata kërkojnë ndërhyrje urgjente për pastrimin e kanaleve dhe përmirësimin e sistemit të kullimit, me qëllim që reshjet e forta të mos shkaktojnë më probleme të tilla për jetën e përditshme të komunitetit.