**SHBA nënshkruan marrëveshje miliardëshe për rritjen e prodhimit të raketave Patriot dhe THAAD**
Shtetet e Bashkuara kanë nënshkruar një marrëveshje prej mbi 3 miliardë dollarësh me kompanitë Lockheed Martin dhe Northrop Grumman. Qëllimi është rritja e prodhimit të komponentëve për raketat interceptuese të sistemeve të mbrojtjes ajrore Patriot dhe THAAD.
Ky vendim vjen në një periudhë kur konfliktet, veçanërisht në Ukrainë dhe tensionet rajonale me Iranin, kanë shkaktuar shpenzimin e një pjese të konsiderueshme të rezervave amerikane të armatimeve.
Marrëveshja, e njoftuar nga Pentagoni dhe Northrop, pason një kontratë të veçantë prej 58.6 miliardë dollarësh, e nënshkruar javën e kaluar. Me këtë kontratë, Lockheed-it iu dha përgjegjësia për prodhimin e raketave interceptuese Patriot.
SHBA-ja ka furnizuar aleatët e saj me sasi të mëdha armësh, ndërkohë që ka përdorur municione edhe në përplasjet rajonale. Kjo ka ngritur shqetësime rreth nivelit të rezervave amerikane të sistemeve të mbrojtjes ajrore dhe armëve me precizion të lartë.
Pentagoni ka bërë të ditur se marrëveshja kornizë do të mundësojë trefishimin e prodhimit të sistemeve Patriot dhe katërfishimin e atij të sistemeve THAAD.
Qendra për Studime Strategjike dhe Ndërkombëtare (CSIS), një institut kërkimor me bazë në Uashington, ka vlerësuar së fundmi se ushtria amerikane disponon më pak se 1,000 raketa interceptuese Patriot dhe më pak se 250 sisteme THAAD. Këto konsiderohen dy prej sistemeve kryesore të mbrojtjes ajrore dhe janë përdorur gjerësisht në Lindjen e Mesme.
Negociatorët e Pentagonit u kanë bërë presion kompanive kontraktuese që të përshpejtojnë zbatimin e marrëveshjeve të përkohshme të prodhimit, të arritura më herët gjatë këtij viti. Kjo me synim rritjen e kapacitetit të prodhimit të raketave.
Ukraina përballet prej kohësh me mungesa të rezervave të sistemeve Patriot, të cilat mbeten e vetmja armë në arsenalin e saj e aftë për të rrëzuar raketa balistike.
Sipas Pentagonit, marrëveshja e re do të krijojë një burim të dytë furnizimi për motorët me karburant të ngurtë PAC-3 dhe do të rrisë prodhimin e pajisjeve të sigurisë për ndezjen e raketave.
Paralelisht, SHBA-ja ka arritur një marrëveshje të ngjashme kornizë edhe me kompaninë RTX Corporation, kompania mëmë e Raytheon. Kjo marrëveshje synon rritjen e prodhimit të raketave lundruese Tomahawk nga rreth 60 njësi në vit, aktualisht për ushtrinë amerikane, në 1,000 njësi në vit në afatgjatë.