Sondazhet e fundit në Francë e pozicionojnë Marine Le Pen si favoriten kryesore për zgjedhjet presidenciale të vitit 2027. Kjo ndodh pavarësisht dënimit të saj në apel për keqpërdorim të fondeve të Bashkimit Evropian.
Dy anketime, të kryera nga institutet Ifop (për LCI dhe Le Figaro) dhe Toluna Harris Interactive (për M6 dhe RTL), sugjerojnë se Le Pen, liderja e partisë së ekstremit të djathtë Tubimi Kombëtar (RN), do të fitonte raundin e parë dhe balotazhin, i parashikuar për më 2 maj 2027.
Megjithatë, institucionet theksojnë se këto rezultate pasqyrojnë vetëm qëndrimin aktual të elektoratit dhe nuk përbëjnë një parashikim përfundimtar, pasi situata politike mund të ndryshojë ndjeshëm deri në raundin e parë të zgjedhjeve, më 18 prill 2027.
**Le Pen forcon epërsinë**
Sipas sondazhit të Ifop, Marine Le Pen regjistron 36% të votave në raundin e parë, një rritje nga 32-34% që kishte në muajt e kaluar. Asnjë prej rivalëve të saj nuk e kalon pragun e 19%. Sondazhi i dytë tregon një panoramë të ngjashme, duke e vendosur Le Pen në krye me një diferencë të konsiderueshme nga kandidatët e tjerë.
Këto anketime u realizuan pasi Gjykata e Apelit konfirmoi fajësinë e Le Pen për keqpërdorim fondesh evropiane, por njëkohësisht zvogëloi afatin e ndalimit të saj për të kandiduar. Pas këtij vendimi, liderja 57-vjeçare e Tubimit Kombëtar (RN) konfirmoi pjesëmarrjen e saj në zgjedhjet presidenciale të 2027-ës.
**Kush mund ta sfidojë?**
Sipas sondazheve, Marine Le Pen do të fitonte edhe në raundin e dytë të zgjedhjeve, pavarësisht kundërshtarit. Ish-kryeministri francez, Édouard Philippe, shfaqet si rivali më i fortë në balotazh, duke regjistruar rezultatin më konkurrues ndaj saj. Megjithatë, Le Pen parashikohet të ketë një epërsi edhe më të madhe në rast përballjeje me ish-kryeministrin Gabriel Attal apo me liderin e së majtës, Jean-Luc Mélenchon.
Nëse ky trend vazhdon në muajt në vijim, Marine Le Pen do të hyjë në garën presidenciale si favoritja kryesore për të marrë drejtimin e Francës pas përfundimit të mandatit të presidentit Emmanuel Macron.