**Gjakovë: Stuhi e Fuqishme Godet Qytetin, Nënkryetari Fetahaj Njofton Për Vlerësimin e Dëmeve**
Një stuhi e fuqishme, e shoqëruar me reshje të dendura shiu dhe erëra të forta, goditi dje një pjesë të Komunës së Gjakovës dhe rrethinat e saj.
Pasojat e stuhisë ishin të dukshme, duke shkaktuar dëme në shumë shtëpi dhe të mbjellat bujqësore, siç raporton IndeksOnline. Situata ishte veçanërisht e rëndë në fshatin Cërmjan dhe zonat përreth, ku kulmet, dyert e dritaret e shumë shtëpive, si dhe disa automjete, pësuan dëmtime.
Lidhur me këtë situatë, nënkryetari i Komunës së Gjakovës, Flamur Fetahaj, deklaroi për IndeksOnline se komuna po i trajton të gjitha këto dëme.
“Sot në mëngjes jemi takuar me kryetarin dhe drejtorët. Tashmë kemi një komision për vlerësimin e dëmeve. Drejtori i Bujqësisë dhe ai i Emergjencave kanë dalë në terren dhe po merren me dëmet e shkaktuara dje nga era dhe shiu, të cilat kanë qenë mjaft problematike,” theksoi Fetahaj.
Ai shtoi se komisioni do të vlerësojë dëmet pasi të shohë gjendjen reale në terren. “Cërmjani dhe një pjesë e Becit ishin zonat më të goditura nga stuhia,” përfundoi nënkryetari.