Besnik Tahiri, shef i Grupit Parlamentar të Aleancës për Ardhmërinë e Kosovës (AAK), ka kritikuar ashpër procesin e deritanishëm për zgjedhjen e presidentit të vendit. Nga holli i Kuvendit të Kosovës, ai e cilësoi këtë proces si një “spektakël politik” pa përmbajtje reale.
Para gazetarëve, Tahiri theksoi se “në fakt nuk ka ndodhur asgjë”. Ai shtoi se i gjithë procesi i konsultimeve për një president unifikues, që prej ditës së parë, ka qenë vetëm për konsum publik. “Ka qenë një spektakël politik i mbajtur me dyer të mbyllura, epilogu i të cilit ka qenë i ditur”, u shpreh ai.
Sipas Tahirit, gjatë gjithë kësaj periudhe nuk ka pasur asnjë përpjekje serioze për të arritur një konsensus politik. Ai theksoi se “asnjëherë nuk kam thënë që mund të ndodhë diçka tjetër përveç këtij epilogu”. Arsyeja, sipas tij, është se nuk ka pasur asnjë konsultim politik mes subjekteve fituese të zgjedhjeve për të gjetur një president unifikues.
Tahiri theksoi se, pavarësisht takimeve të zhvilluara dhe daljeve publike, procesi ka qenë thjesht formal dhe jo thelbësor. Ai shpjegoi se “ka pasur takime të mbyllura, hyrje-dalje dhe konferenca për shtyp, por kurrë nuk ka pasur me të vërtetë një konsultim publik për një president unifikues”.
Ai ngriti shqetësimin për mungesën e një figure që mund të bashkojë skenën politike. “Kosova ka qeveri, madje qeverinë më të madhe në Evropë me 22 anëtarë të kabinetit, por nuk ka një president që përçon një frymë unifikuese”, tha ai.
Duke iu referuar zhvillimeve politike, Tahiri u shpreh se diskutimet mes partive nuk janë fokusuar te posti i presidentit, por te çështje të tjera. “U vërtetua që nuk ka pasur as diskutim për president. Ka pasur diskutime për hyrje apo dalje nga qeveria, gjë që nuk është temë e duhur”, theksoi ai.
Në lidhje me vendimin e Gjykatës Kushtetuese të Kosovës, Tahiri e vlerësoi atë si “jashtëzakonisht të qartë”. “Vendimi është ekstremisht i qartë, bardhë e zi, dhe tregon qartë kur duhet të shkojë vendi në zgjedhje”, tha ai. Tahiri shtoi se pret që procesi të zvarritet nga pushteti aktual.
Ai kritikoi edhe kryeministrin Albin Kurti, duke deklaruar se strategjia e tij politike ka dështuar. “Blofi politik i zotit Kurti, për të vendosur opozitën e Kosovës nën presion, ka dështuar”, deklaroi Tahiri.
Në fund, ai ritheksoi qëndrimin e tij se nuk ka pasur një proces serioz për arritjen e një konsensusi. “Kurrë nuk ka pasur konsultim serioz politik dhe publik për të arritur te një emër unifikues. Ka pasur një farsë, një spektakël, dhe tashmë i ka ardhur fundi”, shtoi ai.