**Arbeloa vlerëson lart Mbappe dhe Vinicius Jr. pas fitores së Real Madridit: “Lojtarë që çdo klub do t’i dëshironte”**
Alvaro Arbeloa, trajneri i Real Madridit, shprehu vlerësim të lartë për sulmuesit Kylian Mbappe dhe Vinicius Jr. pas fitores minimale 1-0 kundër Sevillas. Ai theksoi angazhimin e tyre, pavarësisht periudhës sfiduese që po kalon ekipi.
Më herët, Arbeloa kishte pasur një mosmarrëveshje me sulmuesin francez, por duket se situata është normalizuar. Mbappe luajti si titullar, krah Viniciusit, në fitoren e Realit.
Në prononcimin e tij, Arbeloa deklaroi: “Jam shumë i kënaqur me të gjithë lojtarët dhe përpjekjen e tyre. Është e qartë se jemi të vetëdijshëm që nuk i kemi përmbushur objektivat dhe gjithmonë duam të përmirësohemi.”
Ai shtoi se gjatë katër muajve të fundit, të dy futbollistët “janë përpjekur të japin më të mirën, secili me vështirësitë e veta.”
“Kanë qenë katër muaj të vështirë për të gjithë, përfshirë edhe ata,” – theksoi trajneri. “Por mendoj se janë dy lojtarë që çdo ekip në botë do t’i donte, dhe po të mundnin, do t’i merrnin.”
Sipas Arbeloas, Mbappe dhe Vinicius numërohen ndër pesë futbollistët më vendimtarë në botë, të aftë për të ndryshuar rrjedhën e një ndeshjeje. “Real Madridi është me fat që i ka të dy,” – theksoi ai. “Në ndeshjen e fundit, Vinicius Jr. shënoi golin e fitores, ndërsa Mbappe, pavarësisht një paraqitjeje të shkëlqyer, nuk arriti të gjente rrugën e rrjetës. Është për të ardhur keq që nuk shënoi edhe ai. Shpresojmë të ketë më shumë fat fundjavën e ardhshme,” – përfundoi Arbeloa.