**Thellohet tragjedia në Maldive, zhytës humbet jetën gjatë kërkimit të italianëve të zhdukur**
Një operacion i vështirë kërkimi po zhvillohet në Maldive, ku ekipe specialistësh zhytjeje dhe ekspertësh shpellash nga Finlanda, Britania e Madhe dhe Italia janë nisur drejt atolit Vaavu. Qëllimi është gjetja e trupave të katër zhytësve italianë, të cilët u zhdukën pas një tragjedie nënujore në zonën e njohur si “Shpella e Peshkaqenëve”.
Autoritetet lokale kanë pezulluar përkohësisht kërkimet zyrtare për shkak të kushteve të vështira atmosferike dhe një incidenti fatal të ndodhur së fundmi. Një zhytës ushtarak, pjesë e operacionit të kërkimit, humbi jetën nga sëmundja e dekompresionit, duke e bërë situatën edhe më komplekse dhe rrezikun më të lartë për ekipet në terren.
Operacioni i ri i kërkimit do të rifillojë në orët e para të së hënës. Ai do të udhëhiqet nga ekipe private evropiane, të angazhuara nga familjarët e viktimave dhe autoritetet italiane, me shpresën për të zbardhur fatin e katër trupave ende të pagjetur.
Ndër viktimat e zhdukura janë një profesoreshë e njohur e ekologjisë nga Universiteti i Gjenovës, vajza e saj e re, si dhe dy zhytës të tjerë me përvojë. Më herët, trupi i një anëtari tjetër të grupit, një instruktor zhytjeje, ishte gjetur pranë hyrjes së shpellës nënujore.
Sipas të dhënave paraprake, bombola e oksigjenit e instruktorit të gjetur ka qenë bosh. Ky fakt sugjeron se ai kishte tentuar të dilte nga shpella, por nuk kishte arritur të orientohej në kohë. Kjo ka shtuar dyshimet se edhe pjesa tjetër e grupit mund të ketë përjetuar të njëjtin fat brenda kompleksit nënujor.
Shpella ku ndodhi tragjedia shtrihet në një thellësi rreth 50-60 metrash dhe ka një strukturë të ndërlikuar, me korridore të ngushta, zona me dukshmëri të ulët dhe rryma të forta nënujore. Ekspertët e konsiderojnë atë një nga zonat më të rrezikshme për zhytje në rajon, veçanërisht për shkak të kufizimeve teknike dhe kërkesës për pajisje të specializuara, të cilat mund të kenë munguar në momentin e incidentit.
Hetuesit po shqyrtojnë disa pista për shkaqet e tragjedisë, duke përfshirë mungesën e oksigjenit, çorientimin brenda shpellës, probleme teknike me pajisjet, si dhe ndikimin e rrymave të forta nënujore. Një tjetër hipotezë lidhet me një zinxhir gabimesh gjatë përpjekjes për të ndihmuar njëri-tjetrin, çka mund të ketë çuar në konsum të shpejtë të rezervave të ajrit dhe panik nën ujë.
Sipas ekspertëve, zhytja në këtë zonë kërkon përvojë të lartë teknike dhe leje të posaçme, pasi thellësia dhe kushtet tejkalojnë kufijtë e zakonshëm të zhytjeve rekreative. Pikërisht ky fakt ka ngritur pyetje të shumta mbi mënyrën se si u organizua ekspedita dhe nëse u respektuan të gjitha standardet e sigurisë.
Familjarët e viktimave kërkojnë transparencë të plotë mbi rrethanat e ngjarjes, ndërsa autoritetet italiane dhe ndërkombëtare vijojnë hetimet për të rindërtuar hap pas hapi atë që ndodhi brenda shpellës.
Ndërkohë, atmosfera në Maldive mbetet e tensionuar, ndërsa ekipet e kërkimit përballen me kushte të vështira dhe rreziqe të larta, në një garë me kohën për të zbardhur një nga tragjeditë më të komplikuara të zhytjes në rajon.