**Trump kundërshton këshilltarët: Parandalimi i armëve bërthamore të Iranit, prioritet absolut mbi çmimet e naftës**
Presidenti Donald Trump ripohoi të hënën se objektivi kryesor i Shteteve të Bashkuara në konfliktin me Iranin është parandalimi i pajisjes së këtij vendi me armë bërthamore. Kjo deklaratë vjen në kundërshtim me qëndrimin e disa prej këshilltarëve të tij, të cilët kanë theksuar mbajtjen e ulët të çmimeve globale të naftës dhe gazit si një prioritet po aq thelbësor, raporton CNN.
“Objektivi numër një është dhe do të jetë gjithmonë që Irani të mos mund të ketë, në asnjë mënyrë, formë apo rrethanë, një armë bërthamore. Faleminderit për vëmendjen tuaj ndaj kësaj çështjeje!”, shkroi Trump në platformën e tij sociale, Truth Social, të hënën në mëngjes.
Deklarata e presidentit vjen pasi senatori JD Vance tha javën e kaluar se administrata ka dy objektiva në konfliktin me Iranin, përfshirë ruajtjen e rrjedhës së naftës dhe gazit nga vendet e Gjirit Persik.
Duke folur për Fox News të enjten, Vance u pyet se si mund të përfundojë konflikti. “Është sigurimi që vendet e Gjirit të vazhdojnë të dërgojnë naftë dhe gaz në ekonominë botërore, në mënyrë që të kemi stabilitet të çmimeve të energjisë”, tha Vance, duke shtuar: “Ky është objektivi numër një: Mbajtja e naftës dhe gazit të lirë për amerikanët në të gjithë vendin tonë. Dhe pastaj, natyrisht, objektivi numër dy është të sigurohemi që Irani të mos ketë kurrë një armë bërthamore”.
Kur u pyet të premten për komentet e senatorit Vance, sekretarja e shtypit e Shtëpisë së Bardhë, Karoline Leavitt, u përgjigj se “të dyja objektivat janë njësoj të rëndësishme për presidentin”.