Donald Trump: Marrëveshja me Iranin ose ‘e shkëlqyer’, ose nuk do të ketë fare
Presidenti i Shteteve të Bashkuara, Donald Trump, ka deklaruar se çdo marrëveshje e mundshme me Iranin do të jetë ose “e shkëlqyer dhe domethënëse”, ose nuk do të arrihet fare.
Në një postim në platformën sociale “Truth Social”, Trump kritikoi ashpër ligjvënësit amerikanë që reaguan ndaj raportimeve për një marrëveshje të mundshme me kompromise të mëdha nga ana e SHBA-së.
“Ata demokratë, RINO dhe budallenj që nuk dinë asgjë për marrëveshjen e mundshme me Iranin… gjëra që as nuk janë negociuar ende,” shkroi Trump.
Ai theksoi më tej: “Marrëveshja me Iranin do të jetë ose e madhe dhe domethënëse, ose nuk do të ketë fare marrëveshje. Do të jetë e kundërta e katastrofës së JCPOA-s të administratës Obama.”
Trump iu referua marrëveshjes bërthamore të vitit 2015 (JCPOA), nga e cila SHBA-ja u tërhoq në vitin 2018, duke e cilësuar atë si të dobët dhe duke argumentuar se i hapte rrugë Iranit drejt armëve bërthamore.
Ai theksoi se një marrëveshje e re do të jetë shumë më e fortë, por nuk dha detaje konkrete rreth saj.