Vala e katërt e të nxehtit në Itali ka arritur kulmin, ndërsa autoritetet kanë shpallur alarmin më të lartë në 25 qytete, pasi temperaturat kanë kaluar 40 gradë Celsius në disa pjesë të vendit.
Ministria italiane e Shëndetësisë e ka rritur nga 23 në 25 numrin e qyteteve nën alarm të kuq, shifra më e lartë e regjistruar gjatë kësaj vere. Vetëm Reggio Calabria dhe Messina nuk janë përfshirë në këtë nivel paralajmërimi, por vazhdojnë të mbeten nën alarm të verdhë.
Zonat më të prekura janë Lugina e Po-s dhe Italia qendrore, ndërsa temperaturat në brendësi të vendit dhe në Sardenjë pritet të kalojnë 40 gradë Celsius. Në disa pjesë të Italisë qendrore dhe veriore, temperaturat gjatë natës pritet të qëndrojnë mbi 25 gradë, duke krijuar të ashtuquajturat “net super-tropikale”.
Në provincën e Ternit, temperaturat kanë arritur në 41 gradë Celsius. Ekspertët thonë se kushtet ekstreme janë shkaktuar nga një anticiklon afrikan dhe ngrohja e vazhdueshme e Detit Mesdhe, ku temperatura e sipërfaqes ka arritur ose tejkaluar 30 gradë Celsius në pjesën më të madhe të pellgut.
Meteorologët kanë paralajmëruar se nxehtësia e tepërt mund të shkaktojë paqëndrueshmëri atmosferike dhe stuhi të forta pasdite në Alpe dhe Apenine.
Departamenti i Mbrojtjes Civile ka lëshuar gjithashtu alarme të verdha për reshje të dendura shiu nga Umbria deri në Kalabri dhe në pjesë të brendshme të Sicilisë.
Autoritetet kanë paralajmëruar edhe për rrezik të shtuar nga zjarret, duke vendosur Sicilinë dhe Emilia-Romagnan nën alarm portokalli.
Sipas ekspertëve, një ndryshim i përgjithshëm i motit dhe përfundimi i fazës më të nxehtë të verës nuk pritet para mesit të gushtit.