Dy vende anëtare të NATO-s, të pozicionuara në krahun lindor të aleancës, kanë paralajmëruar se Rusia po përgatit një “provokim” të mundshëm në shtetet baltike ose në Poloni. Ky veprim besohet të jetë një përpjekje për të testuar kohezionin dhe unitetin e aleancës ushtarake perëndimore.
Burime perëndimore shprehin gjithashtu shqetësim se rreziku po rritet, pasi Kremlini po përballet me presion në rritje nga sulmet me rreze të gjatë të Ukrainës ndaj objektivave pranë Moskës dhe Shën Petersburgut.
Të hënën, agjencia e inteligjencës së Letonisë deklaroi: “Ne shohim indikacione se Rusia po përgatit provokime ushtarake kundër vendeve baltike ose Polonisë”. Megjithatë, u theksua se këto veprime nuk do të shkonin në nivelin e një sulmi të plotë dhe të mirëfilltë.
Një burim i lartë politik nga një tjetër vend anëtar i NATO-s bëri një deklaratë të ngjashme javën e kaluar, duke pohuar se “po marrim informacione” se Vladimir Putini “po planifikon diçka kundër shteteve baltike”.
Sipas këtyre burimeve, Putini mund të jetë i gatshëm të testojë angazhimin e SHBA-së ndaj vendeve më të vogla të NATO-s – Estonisë, Letonisë dhe Lituanisë. Kjo shihet si një përpjekje e dëshpëruar për të ndryshuar rrjedhën e luftës në Ukrainë.
Inteligjenca letoneze theksoi se Rusia aktualisht nuk është në gjendje të hapë një front të dytë të plotë. Megjithatë, ajo po shqyrton “sulme hibride”, siç janë përdorimi i raketave, dronëve ose veprimeve të tjera. Këto veprime synojnë të dërgojnë një mesazh të qartë: ndalimin e mbështetjes për Ukrainën, në të kundërt do të ketë pasoja.
Megjithëse këto paralajmërime duken të ndërlidhura, ato nuk shoqërohen me detaje konkrete, ndryshe nga paralajmërimet e CIA-s dhe MI6 para pushtimit të plotë të Ukrainës në shkurt 2022. Këtë e raporton *The Guardian*, të transmetuar nga *Sinjali*.
Këto paralajmërime vijnë në një moment kur përparimi i Rusisë në Ukrainë është ngadalësuar ndjeshëm, duke ngritur pikëpyetje nëse Kremlini mund të përdorë strategji alternative për të kthyer situatën në favor të tij.
Keir Giles, ekspert për Rusinë në “Chatham House”, sugjeroi se Moska mund të kërkojë mënyra për të ndryshuar trendin aktual përmes një përshkallëzimi horizontal të konfliktit ose veprimeve në vende të tjera. Ai shtoi se Rusia nuk duhet pritur të pranojë humbjen në mënyrë pasive.
Ndërkohë, dobësia relative e Rusisë u theksua këtë javë, pasi stacionet e transmetimit të dronëve në Bjellorusi u ndalën pas kërcënimeve të Ukrainës. Një javë më parë, presidenti ukrainas Volodymyr Zelenskyy kishte paralajmëruar Bjellorusinë, duke theksuar se këto pajisje po përdoren për sulme ndaj Ukrainës.
NATO pritet të mbajë samitin vjetor në Ankara këtë muaj, në një periudhë pasigurie lidhur me angazhimin e SHBA-së ndaj aleancës.
Që nga fillimi i pushtimit të plotë të Ukrainës, janë regjistruar disa valë aktivitetesh sabotuese dhe provokuese ruse në vendet e NATO-s. Këto përfshijnë dërgimin e pakove zjarrvënëse në Britani, Poloni dhe Gjermani në verën e vitit 2024. Gjithashtu, shtatorin e kaluar, 19 dronë rusë hynë në hapësirën ajrore të Polonisë, duke detyruar NATO-n të ngrinte avionë luftarakë për t’i neutralizuar ata.
Ndërkohë, Ukraina ka zhvilluar aftësi për sulme me rreze të gjatë, duke goditur objektiva deri në 2,000 km thellë në Rusi. Javën e kaluar, rreth 200 dronë goditën disa lokacione në Moskë, duke shkaktuar dëme të konsiderueshme.
Një burim ushtarak perëndimor theksoi se ekziston shqetësimi që Rusia mund të reagojë ashpër nëse Putini ndjen presion nga zhvillimet e luftës. “Kjo është një periudhë rreziku,” përfundoi ai.