**Vrasje e Dyfishtë në Gjilan: Paraburgim Njëmujor për Babanë e Dyshuar**
Gjykata Themelore në Gjilan ka caktuar masën e paraburgimit prej një muaji për të dyshuarin B.D. Ai akuzohet për veprat penale “Vrasje e rëndë” dhe “Mbajtje në pronësi, kontroll ose posedim të paautorizuar të armëve”.
Ngjarja tragjike, sipas njoftimit të Gjykatës, dyshohet të ketë ndodhur më 1 nëntor të këtij viti, në shtëpinë e të dyshuarit, në fshatin Demiraj të Gjilanit.
Në kërkesën për caktimin e paraburgimit thuhet se i dyshuari B.D., pas një konflikti fizik, dyshohet se ka privuar nga jeta djalin e tij, A.D. Më herët, vajza e tij, D.D., ishte gjetur gjithashtu e pajetë dhe me shenja dhune, në shtratin e babait të saj.
Gjykata e ka vlerësuar masën e paraburgimit si të domosdoshme, duke argumentuar se ekzistojnë arsye ligjore që, nëse i dyshuari lihet i lirë, mund të ndikojë te dëshmitarët dhe të pengojë zhvillimin e procedurës penale.
Palët e përfshira kanë të drejtë të ushtrojnë ankesë kundër këtij vendimi në Gjykatën e Apelit të Kosovës.