Lamine Yamal i Barcelonës nuk u përmbajt në lavdërimin e vetes përpara votimit për “Topin e Artë”. Në një intervistë për “Guardian”, adoleshenti ishte karakteristikisht i sigurt në vete.
“Për të qenë i sinqertë, nuk mendoj se është vetëm që nga ky vit që kam qenë në nivelin për ta fituar Topin e Artë, kjo ka qenë kështu prej më shumë kohësh”, i tha Yamal gazetës angleze, përpara se të shtonte: “Të gjithë e dinë këtë dhe të gjithë e dinë se jam një lojtar që bën diferencën. Mendoj se disa njerëz mendojnë: Lamine është 19 vjeç, një ditë do ta fitojë Topin e Artë, ndaj më mirë t’ia japim dikujt tjetër”.
I pyetur se si planifikon ta mposhtë konkurrencën, anësori shtoi: “Thjesht duhet të fitoj, të fitoj dhe të fitoj përsëri, dhe do të vijë një moment kur nuk do të ketë më asnjë debat. Do të ketë njerëz që do ta pëlqejnë këtë, dhe të tjerë që do të thonë: ‘Sa mendjemadh është’. Dhe kjo është normale”.
Në javët e fundit, Yamal dhe Kylian Mbappe i Real Madridit, në veçanti, kanë promovuar vazhdimisht kandidaturat e tyre me vetëlavdërime të diskutueshme.
Ish-drejtuesi i “Topit të Artë”, Pascal Ferre, beson se kjo është një gabim, duke i thënë së fundmi gazetës franceze “Le Parisien”: “Kur them se mund ta humbasësh Topin e Artë në aspektin e komunikimit, dua të them se një lojtar vihet në qendër të vëmendjes në një mënyrë të pakëndshme dhe u jep votuesve përshtypjen se po shtyhen drejt një vendimi. Ky lloj buje, të cilin disa njerëz e krijojnë, përfundimisht mund t’i irritojë votuesit. Sepse në atë pikë manipulimi bëhet mjaft i dukshëm”.
Ferre nuk i përmendi me emër Yamalin apo Mbappen, por paralajmëroi për rreziqet e vetëpromovimit të sforcuar: “Votuesit nuk janë naivë. Ata kanë si përvojën, ashtu edhe gjykimin e nevojshëm për ta vlerësuar dhe gjykuar një lojtar, pa pasur nevojë të dëgjojnë dhjetë apo pesëmbëdhjetë herë se ai është më i miri”.
Përkrah dy yjeve të sulmit dhe golashënuesit kryesor të Bayernit, Harry Kane, janë edhe disa emra të tjerë të mëdhenj që përmenden si pretendentë.
Mes tyre janë edhe fituesi në fuqi Ousmane Dembele i Paris Saint-Germainit, fituesit të Ligës së Kampionëve, si dhe organizatori spanjoll i mesfushës Rodri, i cili është transferuar nga Manchester City te Barcelona pas paraqitjeve të tij vendimtare në Kupën e Botës.
E hëna, 26 tetor, është data e caktuar për ceremoninë e 70-të të “Topit të Artë”, dhe ngjarja e këtij viti vjen me një ndryshim të rëndësishëm. Për të shënuar përvjetorin, gala prestigjioze do të mbahet në Londër, në vend të Parisit, për herë të parë. Organizatorët e njoftuan vendin e ceremonisë në fund të majit./GazetaExpress/