Të rejat e fundit tregojnë se Francesco Pio Esposito tashmë ka nënshkruar kontratën e re me Interin, pasi të martën mbrëma është parë duke dalë nga selia e klubit në qytetin e Milanos. Besohet se talenti italian ka firmosur kontratë të re deri në vitin 2032.
Një kontratë e re, me rritje të konsiderueshme të pagës për talentin e Italisë dhe fituesin e dy trofeve me Interin në sezonin 2025/26, ishte në horizont prej disa javësh.
Disa burime raportuan të martën në mëngjes se ai pritej ta nënshkruante marrëveshjen e re gjatë ditës.
Esposito u pa duke mbërritur në selinë e klubit në Milano të martën pasdite dhe, sipas raportimeve të ekspertit të transferimeve, Gianluca Di Marzio, 21-vjeçari tashmë është larguar pasi ka firmosur kontratë të re deri në verën e vitit 2032.
Esposito kishte kontratë me Interin deri në verën e vitit 2030, por marrëveshja e re vjen si shpërblim pas një sezoni të jashtëzakonshëm 2025/26, gjatë të cilit shënoi 10 gola dhe dhuroi gjashtë asistime në të gjitha garat, duke u dëshmuar gjithashtu si një opsion i rëndësishëm dhe i menjëhershëm për kombëtaren e Italisë.
Ai tashmë ka regjistruar një gol dhe një asistim në dy paraqitjet e para në Serie A në sezonin 2026/27, të dyja si titullar përkrah kapitenit të Interit, Lautaro Martinez./GazetaExpress/