Pas javësh të tëra këmbënguljeje se një marrëveshje me Iranin ishte e afërt – 38 herë sipas llogaritjes së CNN – kërcënimi i presidentit Donald Trump ndaj Iranit të mërkurën në mëngjes përbënte një kthesë të fortë.
Më pak se 48 orë më parë, Trump u tha gazetarëve se një marrëveshje mund të ishte “dy ose tre ditë” larg. Ai u shfaq më hezitues se kurrë për ta rifilluar armiqësitë me Iranin, pjesërisht sepse kjo do të nënkuptonte mbylljen e vazhdueshme të Ngushticës së Hormuzit “për muaj të tërë”.
“Nëse bëjmë bombardime, e dini, shumë njerëz do të vriten. Kush do ta donte këtë? Unë jo”, tha ai herët të martën.
Të nesërmen, Trump urdhëroi veprime të reja kundër Iranit si hakmarrje për rrëzimin e një helikopteri ushtarak amerikan, edhe pse fillimisht dukej se e minimizoi incidentin. Por diplomacia po vazhdon ende; një delegacion nga Katari mbërriti të mërkurën në Teheran për të tentuar ta zbusë hendekun mes dy palëve.
Nuk është e qartë nëse kërcënimi i ri i Trump për ta bërë Iranin ta “paguajë çmimin” për zvarritjen e marrëveshjes është vetëm retorikë për të shtyrë drejt një marrëveshjeje përfundimtare, apo nëse ai po shqyrton seriozisht veprime të reja.
Por pas javësh deklaratash optimiste për gjendjen e bisedimeve, edhe në mes të përshkallëzimit të tensioneve, kjo solli një qëndrim publik krejt të ndryshëm.