Sali Berisha Deklaron Heqjen e Statusit “Non Grata” nga SHBA-ja
Kryetari i Partisë Demokratike, Sali Berisha, ka deklaruar sot se Shtetet e Bashkuara të Amerikës i kanë hequr statusin “non grata”, pas një periudhe prej mbi tre vitesh nga shpallja e tij.
Lajmi, ende i pakonfirmuar zyrtarisht nga pala amerikane, u bë i ditur nga vetë Berisha. Ai u prit me duartrokitje teksa hynte në sallën e Kuvendit. Ndonëse nuk iu përgjigj pyetjeve të gazetarëve, Berisha u shpreh shkurt nga foltorja: “Unë erdha, u krye”.
Deri më tani, Ambasada e SHBA-së në Tiranë nuk ka reaguar lidhur me këtë deklaratë.
Sali Berisha dhe anëtarët e familjes së tij të ngushtë u shpallën “non grata” nga Departamenti Amerikan i Shtetit (DASH) më 19 maj 2021, pas humbjes së zgjedhjeve të përgjithshme nga Partia Demokratike.
Në atë kohë, Sekretari i Shtetit, Antony Blinken, përmes një mesazhi në Twitter, theksoi se “ish-presidenti i Shqipërisë, Sali Berisha, me aktet e tij korruptive, minon demokracinë”. Blinken shkruante: “Unë në mënyrë publike shpall Berishën dhe anëtarët e familjes së tij të ngushtë si të ndaluar për të hyrë në SHBA. Ne,” theksonte ai, “qëndrojmë të bashkuar kundër korrupsionit me partnerët tanë në Shqipëri.”