Cape Verde vazhdoi paraqitjet mbresëlënëse në Kupën e Botës, duke barazuar 2-2 me Uruguain në ndeshjen e Grupit H. Me këtë rezultat, përfaqësuesja afrikane e zgjati serinë pa humbje në pesë ndeshje radhazi.
Pas barazimit surprizues ndaj Spanjës në takimin e parë, morali në kampin e Cape Verdes ishte i lartë, ndërsa Uruguai kërkonte reagim pas barazimit 1-1 ndaj Arabisë Saudite. Amerikano-jugorët krijuan rastin e parë të mirë me Federico Valverden, por goli i parë erdhi nga Cape Verde në një moment historik.
Kevin Pina realizoi golin e parë të Cape Verdes në histori të finaleve të Kupës së Botës me një goditje spektakolare nga distanca. Topi kaloi murin mbrojtës dhe përfundoi në rrjetë, duke lënë të shtangur portierin Fernando Muslera dhe duke ndezur festën e tifozëve.
Megjithatë, Uruguai reagoi shpejt. Maximiliano Araújo barazoi rezultatin pas një tollovie në zonë, ndërsa në minutat shtesë të pjesës së parë Agustín Canobbio përmbysi gjithçka duke i dhënë epërsinë 2-1 skuadrës së Marcelo Bielsas.
Cape Verde nuk u dorëzua. Në pjesën e dytë, Hélio Varela përfitoi nga një gabim i rëndë i mbrojtjes uruguaiane dhe shënoi për 2-2, duke realizuar golin e tij të parë me kombëtaren. Më pas, Jamiro Monteiro ishte pranë golit të tretë, ndërsa një tjetër gol i Araújos për Uruguain u anulua për pozicion jashtë loje.
Pavarësisht presionit të vonshëm të Uruguait, Cape Verde mbrojti barazimin dhe mori një pikë të vlefshme. Tani afrikanët do të përballen me Arabinë Saudite në ndeshjen e fundit të grupit me shpresa reale për t’u kualifikuar në fazën eliminatore, ndërsa Uruguai do të ketë një sfidë shumë të vështirë kundër Spanjës. /GazetaExpress/