Princi William bëhet miliarder, tejkalon pasurinë e Mbretit Charles III
Princi William, trashëgimtari i fronit britanik, ka arritur një pasuri neto prej 1.6 miliardë dollarësh, sipas vlerësimeve të fundit. Kjo shifër e vendos atë mbi babanë e tij, Mbretin Charles III, në drejtim të pasurisë personale.
William e siguroi këtë pasuri falë Dukatit të Cornwall-it, një pronë private mbretërore që ai mori në administrim në vitin 2022, kur Charles u ngjit në fron. Sipas të dhënave të publikuara, Princi i Uellsit kishte të ardhura private prej 28.5 milionë dollarësh në vitin financiar të fundit të raportuar dhe thuhet se ka paguar më shumë se 26 milionë dollarë në taksa që prej marrjes së titullit.
Ndryshe nga William, Mbreti Charles ende nuk ka arritur statusin e miliarderit. Sipas listës së fundit të të pasurve të “Sunday Times”, pasuria personale e monarkut 77-vjeçar u vlerësua në 846 milionë dollarë, rreth 40 milionë dollarë më shumë se një vit më parë.
Dukati i Cornwall-it shërben si burimi kryesor i të ardhurave për Princin William dhe financon aktivitetet zyrtare, bamirëse dhe private të tij, Princeshës Kate Middleton dhe tre fëmijëve të tyre. Kjo pasuri u themelua në vitin 1337 nga Mbreti Edward III për të siguruar të ardhura për trashëgimtarin e fronit. Sot, ajo përfshin rreth 530 kilometra katrorë tokë në më shumë se 20 qarqe në të gjithë Mbretërinë e Bashkuar.
Gazeta “Times” raporton se William planifikon të shesë 20 për qind të Dukatit në dhjetë vitet e ardhshme, me qëllim investimin e më shumë se 670 milionë dollarëve në projekte strehimi dhe mbrojtjeje të natyrës në zonat e Cornwall, Dartmoor, Ishujt Scilly, Bath dhe Kennington.
Princi William theksoi: “Ka kaq shumë gjëra të mira që mund të bëjmë. Mundohem të sigurohem që t’i jap përparësi gjërave që do të përmirësojnë jetën e njerëzve që jetojnë në këto zona.”