Zyra për Mbrojtje dhe Ndihmë të Viktimave ka trajtuar gjithsej 52 raste të reja gjatë periudhës nga 3 deri më 10 korrik 2026, me shumicën dërrmuese që lidhen me dhunën në familje.
Sipas një njoftimi nga Zyra, nga 52 rastet e trajtuara, 44 prej tyre ishin për dhunë në familje. Përveç kësaj, Zyra ka menaxhuar edhe raste të tjera serioze, duke përfshirë 1 rast dhunimi, 1 sulm seksual, 1 vrasje, 1 kanosje dhe 2 raste që lidhen me krime lufte. Gjithashtu, janë raportuar 1 rast i shkeljes së urdhrit të mbrojtjes dhe 1 rast i shkeljes së detyrimeve familjare.
Gjatë kësaj periudhe, janë parashtruar 7 kërkesa për Urdhër Mbrojtje (KUM) dhe 11 kërkesa për Urdhër Mbrojtje Emergjente (KUME) në gjykata. Janë bërë edhe 2 kërkesa për vazhdim të urdhrit të mbrojtjes dhe 2 kërkesa për ndërprerjen e tyre.
Lidhur me procedurat ligjore, Zyra bën me dije se janë aprovuar 9 aktvendime dhe refuzuar 2 të tjera. Në total, janë zhvilluar 67 seanca gjyqësore dhe 8 seanca në prokurori. Janë ofruar 51 këshilla juridike dhe janë regjistruar 10 aktgjykime dënuese dhe 1 aktgjykim lirues. Dy kërkesa për kompensim nga fondi i viktimave, 4 deklarata të pëlqimit të viktimës për ndihmë dhe 4 ankesa janë gjithashtu pjesë e raportit. Dy raste janë referuar në Qendrën për Punë Sociale (QPS) dhe 1 rast është përfaqësuar nga Zyra në QPS.