Prokuroria Themelore në Ferizaj ka njoftuar se ka ndaluar për 24 orë një të mitur, i dyshuar për kryerjen e veprave penale “Vrasje në tentativë” dhe “Sulm ndaj personit zyrtar” në qendër të qytetit.
Sipas njoftimit të Prokurorisë, incidenti ka ndodhur mëngjesin e së premtes, më 10 korrik 2026, rreth orës 07:53. Ngjarja u zhvillua në rrugën “Dëshmorët e Kombit”, pranë Postës Qendrore në Ferizaj, ku i dyshuari sulmoi me thikë dy persona.
Pas sulmit, i mituri u largua nga vendi i ngjarjes. Megjithatë, falë veprimeve të shpejta hetimore të ndërmarra nga organet e rendit, ai u lokalizua dhe u arrestua nga Policia e Kosovës. Me vendim të Prokurorit të Shtetit, ndaj tij është caktuar masa e ndalimit prej 24 orësh.
Prokuroria Themelore në Ferizaj ka theksuar se hetimet do të vijojnë dhe se do të ndërmerren të gjitha veprimet e nevojshme ligjore për zbardhjen e plotë dhe përfundimtare të rastit.