Segmenti i rrugës “Agim Ramadani” mbyllet përkohësisht për shkak të punimeve
Komuna e Prishtinës ka njoftuar për një mbyllje të përkohshme të një segmenti të rrugës “Agim Ramadani”. Kjo masë vjen si pasojë e punimeve të planifikuara nga Drejtoria e Investimeve Kapitale dhe Menaxhimit të Kontratave, me qëllim përmirësimin e infrastrukturës në kryeqytet.
Sipas njoftimit, segmenti i prekur nga mbyllja shtrihet nga semaforët te Menza e Studentëve deri te kryqëzimi me semaforë te Ministria e Arsimit.
Mbyllja do të fillojë më 18 korrik 2026, në orën 20:00, dhe do të zgjasë deri më 20 korrik 2026, në orën 20:00.
Komuna u ka bërë thirrje qytetarëve që gjatë kësaj periudhe të përdorin rrugë alternative dhe të respektojnë me përpikëri sinjalizimin e përkohshëm të trafikut.
Në fund, Komuna ka falënderuar qytetarët për mirëkuptimin dhe bashkëpunimin e tyre gjatë zhvillimit të këtyre punimeve.