Kërkesë për Paraburgim ndaj të Dyshuarit për Tentativë Vrasjeje në Mitrovicë
Departamenti për Krime të Rënda pranë Prokurorisë Themelore në Mitrovicë ka dorëzuar pranë Gjykatës Themelore një kërkesë për caktimin e masës së paraburgimit ndaj të dyshuarit me iniciale B.R. Ai dyshohet se ka kryer veprat penale “Vrasje në tentativë” dhe “Mbajtje në pronësi, kontroll ose posedim të paautorizuar të armëve”.
Sipas njoftimit të Prokurorisë, i dyshuari B.R. dyshohet se më datë 18 korrik tentoi t’i marrë jetën viktimës B.M., duke e goditur me thikë në kokë, në pjesën e brinjëve dhe prapa kraharorit.
Në deklaratën e saj, Prokuroria thekson se i dyshuari “me datë 18 korrik me qëllim ka dashur ta privojë nga jeta të dëmtuarin B.M., duke e goditur me thikë në kokë, në pjesën e majtë të brinjëve dhe prapa kraharorit.” Si pasojë e këtyre veprimeve, i dëmtuari ka pësuar lëndime të rënda trupore dhe aktualisht ndodhet i shtruar në Kirurgjinë Torakale të QKUK-së.
I dyshuari B.R. u arrestua menjëherë pas ngjarjes, më 18 korrik, dhe ndodhet në mbajtje me vendim të prokurorit.