**Mbikëqyrja e Tregut Forcohet, Kusari-Lila Njofton Rritje të Numrit të Inspektorëve**
Mimoza Kusari-Lila, ministrja në detyrë e Industrisë, Ndërmarrësisë, Tregtisë dhe Inovacionit, ka theksuar se mbrojtja e konsumatorëve dhe forcimi i mbikëqyrjes së tregut janë prioritete thelbësore.
Ajo ka bërë të ditur se që nga muaji gusht, numri i inspektorëve të Inspektoratit Qendror të Mbikëqyrjes së Tregut do të rritet nga 25 në 43. Objektivi është që ky numër të arrijë në 100 inspektorë deri në fund të vitit.
Kjo rritje e kapaciteteve të inspektoratit, sipas ministres, synon të sigurojë një mbrojtje më efektive për qytetarët nga manipulimet, mashtrimet dhe shkeljet në treg.
Kusari-Lila ka falënderuar inspektorët për punën e tyre, duke theksuar se gjatë periudhës së fundit janë kryer një sërë aksionesh. Këto përfshijnë kontrolle në tregun e derivateve të naftës, inspektimin e njehsorëve elektrikë, kontrollin e etiketimit të produkteve ushqimore, si dhe inspektimet ndaj bizneseve që operojnë pa licencë.