Kaltrina Kondi, vajza e Dr. Florit, përlotet për babain e ndjerë dhe shprehet për lojën e Mirit në Big Brother VIP
Kaltrina Kondi, vajza e artistit të ndjerë Dr. Flori, ishte e ftuar këtë të premte në emisionin “Goca dhe Gra”. Gjatë intervistës, ajo u shpreh me lot për mungesën e babait të saj, ndërsa foli edhe për pjesëmarrjen e Mirit në “Big Brother VIP”.
Në një rrëfim emocional lidhur me babain e saj të ndjerë, Kaltrina nuk mundi t’i përmbante lotët, duke theksuar se ndien mungesën e tij çdo ditë. Ajo tregoi se nga tiparet fizike i ngjason babait, ndërsa nga karakteri i ngjason të dy prindërve. Kaltrina kujtoi dëshirën e babait që ajo të kishte një të ardhme të mirë dhe të ishte e shkolluar.
«Unë po ndjek rrugën që dëshiroj dhe besoj se ai është shumë krenar», u shpreh ajo. «Mungesa e tij ndihet çdo ditë. Ka periudha kur e përjetoj shumë rëndë, sidomos kur shoh të tjerët në ditën e diplomimit me prindërit e tyre.»
Më tej, Kaltrina u pyet edhe për lojën e Mirit brenda shtëpisë së “Big Brother VIP”. Ajo e vlerësoi atë si të vetmin banor që nuk ka përdorur ofendime dhe shprehu bindjen se Miri do të jetë fituesi i këtij edicioni.
«Të gjithë banorët janë shumë të mirë. Aty është një lojë, me anët e tyre pozitive dhe negative. Por për mua, vetëm Miri», u shpreh ajo. Kaltrina shtoi se marrëdhënia mes Selit dhe Mirit është e keqkuptuar dhe nuk i është dukur diçka më shumë se thjesht një lojë.
Ajo theksoi forcën dhe durimin e Mirit si lojtar. E pyetur se çfarë do të ndryshonte te ai, Kaltrina u përgjigj: «Të mos ishte aq i mirësjellshëm me banorët që nuk ia duan të mirën.» Ajo nënvizoi se, ndonëse Miri ka një lidhje shumë të mirë shoqërore me Rogertin, në fund të fundit, brenda shtëpisë është vetëm një lojë.
Kaltrina zbuloi se e kishte inkurajuar vetë Mirin të merrte pjesë në shfaqje dhe se ishte gëzuar pa masë për vendimin e tij. «I kemi dërguar mesazhe në ‘Big Brother Live’. Jam shumë krenare», tha ajo. «Edhe vajza e Mirit e shikon çdo ditë, ashtu si ne. Normalisht nuk është ndjerë mirë nga akuzat që ka dëgjuar, por edhe ajo është krenare për babain e saj.»