Udhëheqja në Iran duhet të përfitojë nga një “dritare për diplomaci” me SHBA-në, ka thënë ish-ministri i Jashtëm iranian Mohammad Javad Zarif, duke sugjeruar se faza aktuale e konfliktit mund ta ndihmojë Teheranin të negociojë një pozicion më të favorshëm në skenën ndërkombëtare, shkruan CNN.
Zarif, i cili aktualisht nuk mban asnjë post në sistemin politik iranian, i bëri këto komente në mes të një debati në rritje brenda establishmentit politik të Iranit lidhur me drejtimin që duhet ta marrë vendi pas luftës.
Ndërsa pragmatistët e shohin diplomacinë me Washingtonin si një mundësi, linja e ashpër ka kritikuar rifillimin e angazhimit, duke nxjerrë në pah ndarjet e thella lidhur me të ardhmen e Iranit.
“Në kushtet aktuale, edhe miqtë e Iranit në Jugun Global hezitojnë ta mbështesin hapur Iranin kundër Shteteve të Bashkuara dhe Perëndimit”, pretendoi ai.
Duke ecur përpara, Irani duhet ta përdorë Ngushticën e Hormuzit si mjet presioni në negociata, por jo ta mbajë të mbyllur në një mënyrë që e kthen botën kundër tij, sugjeroi Zarif.
Vendi duhet të krijojë një koalicion me shtete përfshirë Turqinë, Arabinë Saudite, Egjiptin, Pakistanin, Katarin, Omanin, Indonezinë dhe Malajzinë, si dhe të rindërtojë marrëdhëniet me Europën, vazhdoi ai, duke shtuar se bashkëpunimi i Iranit me Rusinë dhe Kinën “duhet të bazohet në vlerën e brendshme të këtyre marrëdhënieve, jo në nevojën apo dobësinë e Iranit”.