Ministri Gashani: Drenasi, vendi më i mundshëm për stadiumin nacional
Çështja e ndërtimit të stadiumit nacional në Kosovë po rikthehet fuqishëm në qendër të vëmendjes, e nxitur nga kërkesa e madhe e tifozëve dhe kapacitetet e pamjaftueshme aktuale për ta përballuar atë.
Interesimi masiv për ndeshjet e Kombëtares së Kosovës ka nxjerrë në pah kufizimet serioze të stadiumit “Fadil Vokrri”. Institucionet dhe palët e interesuara vazhdojnë diskutimet për gjetjen e zgjidhjes më të mirë dhe më të shpejtë për ndërtimin e një impianti të ri modern.
Në këtë kontekst, kryetari i Federatës së Futbollit të Kosovës, Agim Ademi, ka theksuar presionin e jashtëzakonshëm nga tifozët dhe pamundësinë për të përmbushur kërkesat për bileta. Ai ka nënvizuar nevojën urgjente për një stadium të ri që përmbush standardet ndërkombëtare, duke e cilësuar këtë si një domosdoshmëri për zhvillimin e futbollit kosovar.
Prej vitesh, çështja e vendndodhjes së stadiumit ka qenë pengesa kryesore, me Drenasin dhe Bërnicën e Prishtinës si dy zonat më të përfolura. Megjithatë, duket se ka zhvillime të reja lidhur me këtë çështje.
Ministri i Rinisë dhe Sportit, Blerim Gashani, në një intervistë për emisionin “SportCast” në “KosovaPress”, ka theksuar se aktualisht zona e Drenasit mbetet një nga alternativat më të realizueshme.
Ministri Gashani sqaroi se nuk po lobon për asnjë zonë specifike për shkak të lidhjeve personale, por theksoi se Drenasi është aktualisht opsioni më i mundshëm për shkak të hapave të ndërmarrë nga komuna. Ai po ashtu sqaroi se vendndodhja e propozuar nuk është thellë në Drenas, siç mund të mendohet, por afër aeroportit, në kufirin mes Drenasit dhe Fushë Kosovës. Gashani përfundoi duke theksuar rëndësinë e ndërtimit të stadiumit, pavarësisht vendndodhjes përfundimtare, pasi çështja e lokacionit do të vendoset nga ekipet profesionale.