Liqeni i Cyrihut ka arritur nivelin më të ulët historik të ujit, si pasojë e thatësirës së zgjatur që po shkakton vështirësi të dukshme në transport dhe aktivitete të tjera.
Liqeni i Cyrihut ka shënuar nivelin më të ulët të ujit që prej fillimit të matjeve. Thatësira e zgjatur në Zvicër tashmë po sjell probleme konkrete për transportin dhe aktivitetet në liqen. Sipas matjeve të autoriteteve federale në Zürichhorn, niveli i ujit ka zbritur në 404.45 metra mbi nivelin e detit. Kjo shifër thyen rekordin e mëparshëm, të regjistruar në vitin 1952. Matjet në këtë pikë kanë nisur në vitin 1951.
Pasojat e nivelit të ulët të ujit po bëhen gjithnjë e më të prekshme. Që nga fillimi i kësaj jave, trageti Horgen–Meilen ka ndaluar transportin e automjeteve të rënda. Kufizime vlejnë edhe për automjetet sportive dhe ato me distancë të ulët nga toka, pasi rënia e nivelit të ujit e bën hyrjen/daljen nga rampa në traget më të pjerrët dhe të rrezikshme.
Vështirësi po hasin edhe pronarët e anijeve private; në Stäfa, një mol është mbyllur për arsye sigurie. Autoritetet paralajmërojnë se niveli i ulët i ujit mund të shkaktojë lëndime për ata që hidhen nga moli në liqen.
Situata ka ndikuar edhe në sport. Pishina sportive në Käpfnach të Horgenit, e përdorur nga ekipi lokal i vaterpolos, është mbyllur pasi struktura e saj lundruese kishte nisur të prekte fundin e liqenit.
Kompania e Lundrimit të Liqenit të Cyrihut kishte pezulluar më herët shërbimet me anije edhe në lumin Limmat. Kufizime të tjera janë vendosur për lundrimet turistike, ku anijet nuk ndalojnë më në ishullin Ufenau.
Niveli rekord i ulët i Liqenit të Cyrihut vjen në një kohë kur thatësira e vazhdueshme ka ulur ndjeshëm nivelet e lumenjve, përrenjve dhe liqeneve në pjesë të ndryshme të Zvicrës.