**Kostoja e ndërtimit në Kosovë rritet për 4.4% brenda një viti, sipas ASK-së**
Agjencia e Statistikave të Kosovës (ASK) ka publikuar Indeksin e Kostos së Ndërtimit (IKN), i cili tregon një rritje të ndjeshme të kostove në sektorin e ndërtimit. Sipas të dhënave, kostoja e përgjithshme e ndërtimit u rrit me 4.4% në tremujorin e dytë të vitit 2026, krahasuar me të njëjtën periudhë të vitit paraprak.
Nëse krahasohet tremujori i dytë i vitit 2026 (TM2 2026) me tremujorin e dytë të vitit 2025 (TM2 2025), Indeksi i Kostos së Ndërtimit shënoi një rritje prej 4.4%. Rritja më e madhe u vërejt te transporti (11.2%), pagat (8.6%), kostot tjera (5.6%), materialet (4.4%) dhe energjia (2.3%). I vetmi komponent që shënoi ulje ishin makineritë, me një rënie prej 0.9%.
Gjithashtu, ASK raportoi se në krahasim me tremujorin e parë të vitit 2026 (TM1 2026), Indeksi i Kostos së Ndërtimit shënoi një rritje prej 0.9% në TM2 2026. Elementet që kontribuuan në këtë rritje ishin energjia (2.3%), pagat (2.0%), materialet (1.5%), transporti (1.5%) dhe kostot tjera (0.9%). Edhe në këtë periudhë, makineritë panë një ulje, konkretisht me 0.6%.