Benjamin Sesko ka shprehur lehtësimin e madh pasi ka lënë pas problemet e vazhdueshme në kërcirin e këmbës dhe është rikthyer si titullar te Manchester United me gol në Ligën e Kampionëve.
Sulmuesi slloven realizoi në fitoren bindëse 4-0 të “Djajve të Kuq” ndaj Sabah, duke e shënuar rikthimin e tij në formacionin titullar me një paraqitje shumë pozitive.
Sesko: Pritja ishte vendimi i duhur
23-vjeçari beson se periudha e vështirë me dëmtimin tashmë ka mbetur pas.
Problemi në kërcirin e këmbës kishte ndikuar në fundin e sezonit të tij të parë me United dhe i kishte prishur ndjeshëm edhe përgatitjet para fillimit të sezonit të ri.
Megjithatë, pas rikthimit në formacion në Ligën e Kampionëve, Sesko është i bindur se fizikisht është në një gjendje shumë më të mirë.
Duke folur për mënyrën e kujdesshme me të cilën stafi mjekësor menaxhoi rikuperimin e tij, slloveni tha se pritja ishte e domosdoshme për të shmangur një rikthim të dëmtimit.
“Qëllimi ishte të siguroheshim që problemi të mos përkeqësohej. Na duhej pak më shumë kohë se zakonisht, sepse nëse rikthehesh shumë shpejt, dëmtimi mund të shfaqet sërish”, tha Sesko.
“Mendoj se pritja pak më gjatë ishte një vendim shumë i mirë. Tani është shëruar dhe gjithçka është në rregull. Problemi ishte në kërcirin e këmbës.”
Si nisi dëmtimi
Sesko zbuloi se problemi nuk erdhi vetëm nga një incident i vetëm, por nga kombinimi i një goditjeje dhe ngarkesës së madhe fizike.
Dëmtimi kishte nisur në pjesën e fundit të sezonit të kaluar, ku ritmi i lartë i Premierligës dhe ngarkesa fizike ndikuan në gjendjen e tij.
“Mora një goditje sezonin e kaluar, por kishte edhe pak mbingarkesë nga ana ime. Në thelb, kjo ishte arsyeja”, shpjegoi sulmuesi.
Pavarësisht problemeve fizike dhe vështirësive të përshtatjes në kampionatin anglez, Sesko arriti të shënonte 12 gola në sezonin e tij të parë.
“Tani ndihem shumë më mirë në Manchester”
Sulmuesi slloven thotë se tashmë është përshtatur plotësisht me jetën në Manchester dhe po e shijon shumë më tepër futbollin.
Kalimi nga Gjermania në Angli ishte një ndryshim i madh për të, ndërsa sezoni i parë solli një sërë eksperiencash të reja.
“Tani ndihem shumë më mirë, sidomos krahasuar me sezonin e kaluar. Ndryshova shtet dhe gjithçka ishte e re për mua”, tha ai.
“Tani po e shijoj vërtet. Jam shumë i lumtur këtu. Më pëlqen jeta këtu dhe kam bashkëlojtarë të jashtëzakonshëm. Nuk kam për çfarë të ankohem.”
United e ndiqte që kur ishte 16 vjeç
Rruga e Seskos drejt “Old Trafford” mund të kishte nisur shumë më herët.
Manchester United e kishte ndjekur atë që kur ishte vetëm 16 vjeç, por lojtari dhe përfaqësuesit e tij zgjodhën një zhvillim më gradual të karrierës.
Ai fillimisht luajti te Red Bull Salzburg, më pas u transferua te Leipzig dhe vetëm pas këtyre hapave vendosi të kalonte në Premierligë.
Sipas Seskos, kjo ishte një zgjedhje e menduar për ta përgatitur më mirë për presionin e madh që shoqëron një klub si Manchester United.
“Ishte thjesht momenti që ne vendosëm se ishte i duhuri. Mendoj se do të kishte qenë një hap tepër i madh për mua të kaloja direkt nga Austria apo Sllovenia te Manchester United”, shpjegoi ai.
“Më duheshin këto hapa për t’u përmirësuar gradualisht dhe tani më në fund jam këtu”, përfundoi Sesko. /GazetaExpress/