Hoxhaj i PDK-së: Nënshkrimi im, i pari për zhvlerësimin e Gjykatës Speciale
Deputeti i Partisë Demokratike të Kosovës (PDK), Enver Hoxhaj, ka komentuar raportimet se partia e tij pritet të dorëzojë sot në Kuvendin e Kosovës një propozim për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar. Lajmi u raportua nga Ekonomia Online.
Hoxhaj theksoi rëndësinë e një mbledhjeje të Grupit Parlamentar të PDK-së për të diskutuar këtë çështje. Më tej, ai siguroi se nënshkrimi i tij do të jetë i pari në mbështetje të ndërmarrjes së hapave konkretë për ta zhvlerësuar Gjykatën Speciale në Kuvendin e Kosovës.
“Duhet të mbahet një mbledhje me Grupin Parlamentar të Partisë Demokratike të Kosovës. Ndërsa, nëse më pyesni për qëndrimin tim personal, qëndrimi im personal është se nënshkrimi im është i pari për të marrë hapa konkretë për ta zhvlerësuar Gjykatën në Kuvendin e Kosovës”, deklaroi Hoxhaj.