Një aksident tragjik rrugor ka ndodhur në orët e para të mëngjesit të sotëm në Prizren, duke i marrë jetën një 19-vjeçari dhe duke lënë të lënduar shoferin e mjetit.
Ngjarja e rëndë ka ndodhur rreth orës 01:05, në fshatin Lutogllavë, pjesë e magjistrales Suharekë–Prizren. Viktima, i moshës 19 vjeç, nga fshati Piranë i Prizrenit, ishte pasagjer në automjetin që pësoi aksidentin e vetëm.
Lajmin e ka konfirmuar zëdhënësi i Policisë së Kosovës për rajonin e Prizrenit, Shaqir Bytyqi, i cili ka dhënë detaje mbi rrethanat e ngjarjes.
Sipas informatave të para të policisë, dyshohet se aksidenti ka ardhur si pasojë e mos përshtatjes së shpejtësisë nga drejtuesi i automjetit, gjithashtu rreth 19 vjeç, me kushtet dhe rrethanat e rrugës. Rruga, siç theksohet, ishte e lagësht për shkak të reshjeve të shiut, çka bëri që shoferi të humbë kontrollin mbi automjetin dhe të dalë jashtë rrugës. Si pasojë e kësaj, pasagjeri humbi jetën, ndërsa shoferi pësoi lëndime trupore.
Menjëherë pas ngjarjes, në vendin e aksidentit kanë dalë njësitet përkatëse policore dhe ekipet e emergjencës. Prokurori kujdestar është njoftuar për rastin dhe, me urdhër të tij, trupi i pajetë i viktimës është dërguar për obduksion në Institutin e Mjekësisë Ligjore (IML). Ndërkohë, shoferit të lënduar i është caktuar masa e ndalimit policor për 48 orë, si i dyshuar për shkaktimin e aksidentit fatal.
Policia, në koordinim të plotë me Prokurorin e Shtetit, po vijon të gjitha veprimet e nevojshme hetimore me qëllim të zbardhjes së plotë të rrethanave dhe shkaqeve që çuan në këtë aksident tragjik.