**Mitrovicë: Policia godet bixhozin e paligjshëm, konfiskon 1610 çipa dhe një thikë**
Policia e Kosovës ndërhyri në një lokal në Mitrovicën e Jugut, ku u kapën disa persona duke luajtur bixhoz të paligjshëm.
Ngjarja, sipas njoftimit të policisë, ndodhi më 13 tetor 2026, rreth orës 03:50, në rrugën “Kemajl Ataturk”.
Gjatë kontrollit të lokalit, zyrtarët policorë vërtetuan se disa persona po luanin bixhoz. Po ashtu, gjatë kontrollit fizik të njërit prej të dyshuarve, u gjet dhe u sekuestrua një thikë.
Në vendin e ngjarjes, policia sekuestroi katër valixhe me gjithsej 1,610 çipa, si dhe tetë palë letra bixhozi.
Për rastin u njoftua prokurori i shtetit, i cili urdhëroi marrjen në pyetje të pronarit të lokalit në cilësinë e të dyshuarit. Ndaj tij do të nisë rast penal për organizim të skemave piramidale dhe bixhozit të paligjshëm, si dhe për posedim të paautorizuar të armëve.
Pas marrjes në pyetje, me urdhër të prokurorit, të dyshuarit u liruan në procedurë të rregullt.