Agjenti i Nico Williams zbulon pse spanjolli refuzoi Barcelonën, Arsenalin dhe Liverpoolin
Nico Williams vazhdon të jetë një nga figurat më besnike në futbollin modern, pasi i është përkushtuar të ardhmes afatgjate tek Athletic Clubi, pavarësisht interesimit të madh nga gjigantët evropianë. Përfaqësuesi i futbollistit spanjoll ka bërë të ditura rrethanat që e shtynë anësorin të refuzojë ofertat joshëse nga Premier Liga dhe La Liga.
Agjenti i Williams ka konfirmuar publikisht se lojtari i Kombëtares Spanjolle kishte refuzuar ofertat e Arsenalit dhe Liverpoolit dy vjet më parë. Anësori 24-vjeçar mbetet një nga shtyllat kryesore të projektit të Athletic Clubit, pasi e ka vulosur përkushtimin e tij ndaj klubit nga “San Mamés” duke nënshkruar një zgjatje kontrate 10-vjeçare, e cila skadon në vitin 2035. Ky vendim erdhi në një kohë kur Williams konsiderohej si një nga talentet më të kërkuara në kontinent, pas një periudhe të mbushur me trofe si me klubin, ashtu edhe me kombëtaren.
Williams ishte në qendër të spekulimeve të shumta gjatë verës së vitit 2024, menjëherë pas rolit të tij vendimtar në triumfin e Spanjës në Kampionatin Evropian. Ai shënoi në finalen kundër Anglisë, duke i shtuar këtij suksesi edhe triumfin në Kupën e Mbretit me Athleticun.
Felix Tainta, përfaqësuesi i lojtarit, foli për interesimin e madh gjatë një paraqitjeje të fundit në podkastin “Los Fulanos”, duke theksuar se pothuajse të gjithë gjigantët e futbollit evropian ishin përfshirë në garën për nënshkrimin e klientit të tij.
“Të gjithë e dimë për interesimin e Barcelonës në verën e vitit 2024, pas Kampionatit Evropian”, shpjegoi Tainta gjatë intervistës. “Barcelona, Arsenali, Bayern Munihu, Liverpooli, Paris Saint-Germaini… Mund t’i përmend të gjithë. Të gjithë e dëshironin Nikon dhe nuk është e lehtë që një lojtar t’i refuzojë të gjitha këto klube. Më pas, biseduam me Barcelonën. Athleticu e dinte këtë, sepse i mbaja të informuar gjatë gjithë kohës për situatën, edhe pse ishin të zemëruar me Barcelonën për mënyrën se si po vepronte. Pas kësaj, nisa bisedimet”, tha ai.
Ndonëse Arsenali dhe Liverpooli ishin pjesëmarrës të rëndësishëm në garë, Barcelona ishte klubi që këmbënguli më së shumti për të siguruar anësorin. Klubi katalanas dëshironte me çdo kusht ta bashkonte Williamsin me bashkëlojtarin e tij nga kombëtarja, Lamine Yamal, por transferimi dështoi përfundimisht për shkak të paqëndrueshmërisë së vazhdueshme financiare të ‘Blaugranëve’.
Tainta zbuloi se shqetësimi kryesor i kampit të Williamsit ishte pamundësia e klubit për të dhënë garanci të qarta lidhur me regjistrimin e tij në La Liga, për shkak të faturës së lartë të pagave. Tainta theksoi se një lojtar i kalibrit të Williamsit nuk mund ta përballonte të qëndronte në tribunë për shkak të problemeve në regjistrim.
“Erdhi një moment gjatë negociatave kur Nico nuk mund të mbetej pa minuta në fushë”, vazhdoi Tainta. “Nico është një makinë e Formula 1. Nëse vij në shtëpinë tënde, nuk mund ta marr përsipër problemin tënd. Dhe këtë ia bëra të qartë Barcelonës”, e mbylli ai.