Franca u përfshi nga trazira të dhunshme të shtunën, si pasojë e protestave masive kundër vështirësive në arsim dhe rritjes së kostos së jetesës. Mbi 1200 persona u arrestuan dhe ndërtesa të shumta u dogjën, ndërsa dhuna u shpërnda në të gjithë vendin.
Autoritetet franceze raportuan të paktën 1200 të arrestuar, në atë që qeveria e cilësoi si një “përshkallëzim të dhunës”. Rreth 550,000 protestues dolën në rrugë në mbarë vendin.
Në kryeqytetin Paris, përplasjet e ashpra vazhduan deri në mbrëmje. Forcat e rendit, duke përdorur gaz lotsjellës dhe autobote, u përballën me turmat e protestuesve.
Zjarre masive shpërthyen në ndërtesa të ndryshme, si në Paris ashtu edhe në qytete të tjera. Në Limoges, një zjarr i fuqishëm në bashki shkaktoi shembjen e pjesshme të çatisë. Njëkohësisht, u raportuan grabitje dhe akte vandalizmi të përhapura, duke shënjestruar ndërtesa publike dhe biznese.
Kryeministri Sébastien Lecornu konfirmoi se 150 efektivë policie u plagosën gjatë trazirave.
Fillimisht, tubimi kryesor në Paris u zhvillua në mënyrë paqësore gjatë pasdites. Disa të rinj, të intervistuar nga BBC, theksuan se ishin “pacifistë” që “thjesht po përpiqen të ndryshojnë gjërat, por asgjë nuk po lëviz”. Megjithatë, me kalimin e orëve, situata degradoi: grupe të caktuara ndezën zjarre në rrugë, dogjën automjete dhe shkatërruan zona emblematike si Place de la République. Raportohen gjithashtu plaçkitje dyqanesh dhe djegia e të paktën një restoranti, si dhe përleshje të shpeshta mes grupeve të ndryshme.
Në qendër të Parisit, forcat kundër trazirave u panë duke ndërhyrë dhunshëm ndaj turmës, duke goditur disa persona me shkopa gome.