Ylli i Barcelonës, Lamine Yamal, është vazhdimisht në qendër të diskutimeve për futbollistin më të mirë në botë.
Fakti që ai është pjesë e këtyre diskutimeve në moshën 19-vjeçare është tashmë i jashtëzakonshëm, ndërsa është njëri prej favoritëve për ta fituar Topin e Artë të hënën.
Talenti i ri tashmë është bërë pjesë e një tjetër debati për futbollistët më të mirë ofensivë në Evropë.
Presidenti i nderit i Bayern Munichut, Uli Hoeness, ka pretenduar se Michael Olise është tashmë një futbollist më i mirë se spanjolli.
Siç raporton “SPORT”, Hoeness e bëri këtë krahasim gjatë një interviste për gazetën gjermane “Welt am Sonntag”, ku shprehu admirimin e tij për anësorin e Bayernit.
“Michael Olise është në rrugën për t’u bërë futbollisti më i mirë në botë. Për mua, ai është më i mirë se Lamine Yamal”, deklaroi Hoeness.
Ish-presidenti i Bayernit shpjegoi gjithashtu pse e konsideron përfaqësuesin francez një talent kaq të jashtëzakonshëm.
“Ai shënon gola, jep asistime, është i shpejtë… Praktikisht, është futbollisti i përsosur”, shtoi ai.
Olise ka bërë përparim të madh që nga transferimi te Bayerni nga Crystal Palace dhe është shndërruar në një figurë të rëndësishme në repartin ofensiv të bavarezëve.
Megjithatë, vendimi i Hoeness për ta përfshirë drejtpërdrejt emrin e Lamine në këtë krahasim është interesant, duke pasur parasysh se edhe francezi është në garë për Topin e Artë.
Çdo klub ka gjasa të besojë se futbollistët e tij janë më të mirët në botë, por në këtë rast, gara mes Lamine dhe Olise është vërtet e ngushtë.
Nuk ka shumë dyshime se Olise bën pjesë në mesin e futbollistëve ofensivë më emocionues në Evropë, por pretendimi se ai është më i mirë se Yamal mbetet çështje mendimi.
Anësori i Barcelonës ofron shumë më tepër sesa shkëlqimin individual. Aftësia e tij për të tërhequr disa mbrojtës, për të krijuar hapësira dhe për të diktuar aksionet sulmuese e ka bërë atë një element qendror në sistemin e Hansi Flickut.
Ai është bërë gjithashtu njëri prej emrave të parë në formacionin e Spanjës, ndërsa ajo që e bën këtë edhe më të jashtëzakonshme është përgjegjësia që bart në një moshë kaq të re.
Si Barcelona, ashtu edhe Spanja, mbështeten vazhdimisht tek ai për t’i nxjerrë nga situatat e vështira, ndërsa Lamine u përgjigjet këtyre pritshmërive me një vazhdimësi mbresëlënëse.
Olise është shndërruar në njërin prej anësorëve të djathtë më të mirë në botë, por, duke parë situatën aktuale, ka argumente për të mbështetur mendimin se Lamine është paksa përpara tij.
Spanjolli pritet të përballet me Real Madridin në “El Clásico” sonte dhe do të dëshirojë të bëjë një paraqitje që dëshmon vlerat e tij.
Mbetet të shihet se si do të paraqitet Lamine kundër madrilenëve dhe nëse do ta fitojë Topin e Artë nesër në Londër./GazetaExpress/