Komisioni Parlamentar për Arsim dhe Shkencë organizoi një diskutim mbi sfidat dhe prioritetet e arsimit parauniversitar në Republikën e Kosovës. Kryetari i Komisionit, Enver Hoxhaj, theksoi se rezultatet e testit PISA shpërfaqin dobësi serioze në sistemin arsimor të vendit.
Hoxhaj shprehu shqetësimin për mungesën e një debati të mirëfilltë mbi strategjinë e Ministrisë së Arsimit, Shkencës, Teknologjisë dhe Inovacionit (MASHTI). Ai përmendi vlerësimin e nxënësve, rezultatet e PISA-s, tekstet shkollore dhe lidhjen e arsimit me tregun e punës si çështje thelbësore. Sipas tij, cilësia e arsimit varet në masë të madhe nga përgatitja, puna dhe pagesa e mësimdhënësve në klasa. Hoxhaj theksoi se rezultatet e PISA-s, pavarësisht se janë një vlerësim i jashtëm ndërkombëtar, tregojnë qartë dobësitë e fushës së arsimit, ndërsa çështja e teksteve shkollore dhe përgatitja e të rinjve për tregun e punës mbeten tema permanente diskutimi.
Nga ana tjetër, zëvendësministri i Arsimit, Përparim Kryeziu, prezantoi edukimin në fëmijërinë e hershme si një nga katër shtyllat kryesore të strategjisë së re arsimore. Ai theksoi rëndësinë e kësaj faze për zhvillimin socio-emocional të fëmijëve dhe për ngritjen e cilësisë së arsimit në shkollat e mëvonshme. Kryeziu përmendi studimet që dëshmojnë performancën më të mirë të nxënësve që kanë ndjekur çerdhet në fëmijërinë e hershme. Në këtë drejtim, ministria do të fokusohet në zgjerimin e rrjetit të çerdheve publike dhe organizimeve të tjera për edukimin e hershëm.