Deputeti i Lëvizjes Vetëvendosje, Agim Bahtiri, ka komentuar sërish ofertën e kryeministrit Albin Kurti drejtuar partive opozitare, Partisë Demokratike të Kosovës (PDK) dhe Lidhjes Demokratike të Kosovës (LDK), për propozimin e kandidatëve për president. Bahtiri e ka theksuar sinqeritetin e kësaj oferte, duke shtuar se fati i vendit për të shkuar ose jo në zgjedhje të reja varet tani nga veprimet e opozitës.
Sipas Bahtirit, propozimi i Kurtit, që u jep mundësinë opozitës të paraqesë tre kandidatë për postin e presidentit, është “i sinqertë dhe njerëzor”. Ish-kryetari i Mitrovicës theksoi se përgjegjësia për parandalimin e zgjedhjeve të parakohshme bie tani mbi PDK-në dhe LDK-në.
Nëpërmjet një postimi në rrjetet sociale, Bahtiri iu drejtua deputetëve opozitarë, duke shpjeguar që Vetëvendosje asnjëherë nuk ka pasur qëllim të marrë të gjitha postet kyçe shtetërore. Ai pretendoi se mosgatishmëria e tyre për të propozuar një kandidat serioz për president detyroi VV-në të paraqiste dy kandidatë të saj, një përpjekje që nuk rezultoi me sukses. Bahtiri vuri në dukje se oferta aktuale është e treta mundësi për opozitën që të propozojë kandidatë të mundshëm për kreun e shtetit.
Duke iu referuar situatës së tanishme, deputeti i VV-së theksoi se “sot është në dorën tuaj nëse vendi shkon në zgjedhje apo jo”. Ai bëri një apel të fuqishëm: “Për hir të atyre që kanë dhënë jetën e tyre, gjakun e tyre për të pasur shtet dhe institucione të shtetit të Kosovës, ju kisha lut mos shkelni mbi gjakun e tyre”. Bahtiri u kërkoi atyre “të dalin mbi interesat personale e partiake” dhe të gjejnë “tre kandidatë të mundshëm, më të mirët që i ka Kosova”, duke garantuar përkrahjen 100% nga Lëvizja Vetëvendosje. Në fund, ai përsëriti se “kjo është tani në dorën tuaj”.