Massimiliano Allegri po e konsideron seriozisht largimin nga Milani në fund të sezonit, pas një përçarjeje të thellë me këshilltarin e klubit, Zlatan Ibrahimovic.
Sipas raportimeve nga mediat italiane, marrëdhënia mes trajnerit italian dhe ish-yllit suedez është përkeqësuar ndjeshëm gjatë javëve të fundit, duke krijuar tension të lartë brenda klubit. Allegri thuhet se është i lodhur nga konfliktet e brendshme dhe nga situata e vështirë sportive që po kalon Milani këtë sezon.
Burimet pranë klubit bëjnë të ditur se konflikti mes tyre lidhet edhe me rolin e Ibrahimovic në strukturën drejtuese të Milanit dhe me ndërhyrjet e tij në çështjet sportive të skuadrës.
Situata në “San Siro” është larg qetësisë, pasi Milani po lufton për një vend në Champions League, ndërsa rezultatet e dobëta të muajve të fundit kanë rritur ndjeshëm presionin mbi drejtuesit dhe stafin teknik.
E ardhmja e Allegrit mbetet e pasigurt, pavarësisht se ai ka kontratë me klubin. Një largim i mundshëm do të varet nga zhvillimet në dy ndeshjet e fundit të sezonit dhe nga vendimi i drejtuesve të Milanit për projektin e ardhshëm.
Ky zhvillim shton edhe më shumë pasigurinë rreth një sezoni të komplikuar për kuqezinjtë, ku tensionet e brendshme po bëhen po aq të rëndësishme sa edhe rezultatet në fushën e lojës. (Gazeta Express)