Muharremi: Institucionet nuk mund të financojnë projekte pa kontrolluar përmbajtjen
Prishtinë – Agim Muharremi ka theksuar se institucionet shtetërore nuk mund të financojnë projekte me fonde publike pa kontrolluar në detaje përmbajtjen e tyre. Kjo deklaratë vjen si një sqarim i nevojshëm lidhur me projektin e ekspozitës, e cila ka ngjallur polemika të shumta në sheshin e Prishtinës.
“Institucionet publike të shtetit nuk mund të deklarojnë se ‘ne i japim paratë’ e taksapaguesve dhe ‘nuk ndërhyjmë në përmbajtjen e projekteve që prezantohen’,” u shpreh Muharremi. Ai e konsideroi këtë qasje “totalisht të gabuar dhe të papranueshme.”
Sipas tij, kur financohen projekte me para publike, çdo element – qoftë ai germë, fjalë, numër, fotografi, logo, apo përmbajtje e përgjithshme – duhet të kontrollohet dhe aprovohet rigorozisht para se të bëhet publik. “Kjo është një praktikë standarde kudo në botë,” shtoi ai.
Muharremi theksoi se kushdo që merr fonde nga taksapaguesit gjermanë, të Bashkimit Evropian, amerikanë apo japonezë, do të vërejë se çdo detaj kontrollohet me imtësi. Ai paralajmëroi se këto fonde nuk vijnë nga xhepat personalë të zyrtarëve, por janë para të taksapaguesve, shpeshherë edhe të qytetarëve më të varfër të Evropës.
“Nëse institucionet nuk posedojnë njohuritë e nevojshme mbi funksionimin dhe menaxhimin e fondeve publike, ky është një problem më vete,” vazhdoi Muharremi. “Megjithatë, mos e fshihni injorancën tuaj institucionale dhe mos qeverisni me gënjeshtra duke deklaruar se ‘nuk ndërhyjmë në përmbajtje’, pasi kontrolli është një detyrim themelor i çdo institucioni që shpërndan paratë e popullit.”
Ai e përmbylli deklaratën me një akuzë të rëndë: “Ata që kanë shpërndarë fondet publike dhe nuk kanë kontrolluar apo aprovuar përmbajtjen e prezantimit, janë bashkëpjesëmarrës në krim.”