**iPhone 18 Ultra i palosshëm: Pamjet e pretenduara zbulohen pak para eventit të Apple**
Pak ditë para eventit madhor të Apple për vitin 2026, në internet janë shpërndarë pamje që supozohet se zbulojnë dizajnin e shumëpritur të iPhone-it të parë të palosshëm, i cili mund të prezantohet si ‘iPhone 18 Ultra’.
Lewis Hilsenteger, krijuesi i kanalit të njohur kanadez në YouTube, “Unbox Therapy”, ka publikuar një video që tregon një model demonstrues të pajisjes së palosshme, krahasuar me iPhone 18 Pro Max.
Sipas Hilsenteger, pajisjet i janë siguruar nga një burim i paidentifikuar në Kinë.
“Informacionet që po vijnë nga Kina po bëhen gjithnjë e më të sakta. Gjërat që po dërgojnë po duken gjithnjë e më shumë si produktet përfundimtare”, tha Hilsenteger.
**Dizajn si libri**
Nga pamjet, iPhone-i i palosshëm duket se ka një dizajn ‘book-style’, që hapet si një libër. Kur është i mbyllur, pajisja paraqet një ekran të jashtëm në pjesën e përparme dhe dy kamera në pjesën e pasme. Me hapjen e tij, zbulohet një ekran i madh i brendshëm, më i gjerë sesa i lartë.
Videoja ka tërhequr menjëherë vëmendje të madhe, duke grumbulluar afro dy milionë shikime dhe mijëra komente.
“Personi që i ka furnizuar këto modele demonstrimi ka qenë i saktë për pesë vjet radhazi, kështu që jam i bindur se kështu do të duken iPhone-ët e rinj”, shkroi një shikues.
**Dy kamera dhe butonat e volumit, të pozicionuar ndryshe**
Modeli i shfaqur ka një anë të drejtë përgjatë pjesës së palosjes, ndërsa skaji i jashtëm është më i rrumbullakosur. Pjesa e pasme është e bardhë, me finiturë mate dhe logon e Apple me sipërfaqe me shkëlqim. Moduli i kamerave, me dy lente të vendosura horizontalisht, ndodhet në këndin e sipërm të majtë.
Një ndryshim thelbësor krahasuar me iPhone-ët aktualë lidhet me pozicionimin e butonave të volumit. Në vend të anës së pajisjes, si në modelet ekzistuese, në këtë prototip ata janë vendosur në pjesën e sipërme. Dy butona të tjerë mbeten në anë, për të cilët Hilsenteger supozon se janë butoni i ndezjes/zhbllokimit dhe ‘Action Button’.
**Ekran i madh, por me vijë palosjeje të dukshme**
Kur pajisja hapet plotësisht, shfaqet një ekran i madh kryesor. Megjithatë, në modelin e publikuar, mekanizmi dhe vija e palosjes duken mjaft të theksuara. Hilsenteger theksoi se kjo nuk do të thotë domosdoshmërisht se produkti përfundimtar do të jetë i njëjtë.
“Nuk ka mundësi që mekanizmi i tyre i palosjes të jetë kaq i theksuar në produktin përfundimtar, natyrisht”, u shpreh ai.
Pajisja demonstrative nuk ndizet, ndaj videoja nuk ofron informacione për sistemin operativ, funksionet e ekranit apo specifikat e tjera teknike.
**Reagime të ndryshme nga fansat**
Pamjet kanë shkaktuar reagime të përziera mes fansave të Apple.
“Do të doja që telefoni të ishte pak më i gjatë kur është i mbyllur. Isha shumë i emocionuar për të, por kjo është zhgënjyese”, shkroi një komentues.
Një tjetër kritikoi pozicionimin e butonave të volumit. “Butonat e volumit në pjesën e sipërme, kur telefoni përdoret i palosur në pozicion vertikal, janë absurdë”, shkroi ai.
Një tjetër përdorues ishte edhe më i drejtpërdrejtë: “Nuk më pëlqen aspak ky model i palosshëm.”
**Prezantimi zyrtar i Apple pritet më 9 shtator**
Nuk do të duhet shumë kohë për të mësuar nëse modeli i publikuar në video është vërtet i ngjashëm me pajisjen përfundimtare të Apple. Eventi i kompanisë është planifikuar të nisë më 9 shtator, në orën 10:00 sipas kohës lokale në Kaliforni.
Ky prezantim vjen pak ditë pasi John Ternus pritet të marrë drejtimin e Apple nga Tim Cook. Ternus njihet si një prej drejtuesve të Apple më të fokusuar te zhvillimi i produkteve dhe harduerit të ri, ndaj pritjet janë që kompania të prezantojë disa pajisje të reja, krahas modelit të përfolur iPhone 18 Ultra.
Apple nuk ka komentuar deri më tani mbi rrjedhjen e fundit të pamjeve, ndërsa mbetet për t’u parë nëse modeli i palosshëm që po qarkullon në internet do t’i ngjajë produktit që kompania do të prezantojë zyrtarisht.