Ben Affleck ka deklaruar se rritja e ndjeshme e kostove të prodhimit po transformon industrinë filmike, duke i dhënë njëfarë peshe pretendimeve se Hollywood është në rënie.
Gjatë një interviste në podkastin All the Smoke, aktori dhe regjisori amerikan theksoi se sfidat aktuale nuk lidhen me mungesën e interesit për filma, por me vështirësinë në financimin e projekteve.
Ai kujtoi se më parë realizoheshin shumë filma me buxhete modeste, ndërsa sot hyrja në industri kërkon investime dukshëm më të larta, duke kufizuar hapësirën për projekte më të vogla dhe eksperimentale.
Sipas Affleck, ekziston nevoja për një model që mundëson prodhimin e filmave jo domosdoshmërisht komercialë, pa kosto të tepruara, por me standarde profesionale. Ai vuri në dukje gjithashtu se xhirimet në Kaliforni janë bërë më të shtrenjta krahasuar me vende të tjera që ofrojnë incentiva fiskale për industrinë filmike.
Duke folur për buxhetet aktuale, Affleck theksoi se një film që synon shfaqjen në kinema kërkon zakonisht të paktën rreth 20–23 milionë euro si pikënisje.
Kjo shumë mund të rritet ndjeshëm me përfshirjen e efekteve vizuale apo skenave aksion, ndërsa kostot e marketingut shpesh arrijnë nivele të ngjashme me prodhimin, duke e çuar investimin total deri në rreth 40–50 milionë euro.
Megjithatë, ai nënvizoi se industria mbetet aktive, duke shtuar se vetë vazhdon të jetë i angazhuar në projekte të reja si aktor dhe producent. /GazetaExpress/