**Aktakuzë për Tentativë Vrasjeje të Rëndë dhe Armëmbajtje pa Leje në Malishevë**
Prokuroria Themelore në Gjakovë, Departamenti i Krimeve të Rënda, ka ngritur aktakuzë ndaj të pandehurit me inicialet S.M., i cili akuzohet për veprat penale të “Vrasjes së rëndë në tentativë” dhe “Mbajtjes në pronësi, kontroll ose posedim të paautorizuar të armëve”.
Sipas aktakuzës, ngjarja ka ndodhur më 11 qershor 2026, rreth orës 12:07, në fshatin Pagarushë të Komunës së Malishevës. Pas një mosmarrëveshjeje lidhur me linjën e autobusëve, i pandehuri S.M., armatosur me një kallashnikov (armë automatike e tipit AK-47), fillimisht ka bllokuar rrugën me traktorin e tij. Më pas, ai ka qëlluar disa herë me armë zjarri në drejtim të autobusit që drejtohej nga i dëmtuari V.S., ku si pasagjerë ishin edhe F.K. dhe H.K.
Nga të shtënat janë goditur disa pjesë të autobusit, duke vënë në rrezik seriozisht jetën e personave brenda tij. Fatmirësisht, asnjëri prej tyre nuk ka pësuar lëndime trupore.
Gjithashtu, i pandehuri S.M. posedonte pa autorizim armën automatike AK-47, së bashku me karikatorin dhe municionet, me të cilën dyshohet se u krye vepra penale. Arma dhe municioni janë sekuestruar në vendin e ngjarjes.
Me këto veprime, S.M. akuzohet për “Vrasje të rëndë në tentativë” sipas nenit 173 par.1 nënpar.1.5 lidhur me nenin 28 të KPRK-së, si dhe për “Mbajtje në pronësi, kontroll ose posedim të paautorizuar të armëve” sipas nenit 366 par.1 të KPRK-së.
Prokurori i çështjes i ka propozuar gjykatës që, pas zhvillimit të shqyrtimit gjyqësor dhe administrimit të provave, i pandehuri të shpallet fajtor dhe të dënohet sipas ligjit për veprat penale që i vihen në barrë.